१२ साउन २०८३, मंगलबार
कोशी प्रदेश सरकारमा मन्त्रालयको भागबन्डा मिलाउन मुख्यमन्त्रीको शपथ ग्रहणको कार्यक्रम सारिएको छ । बिहान साढे १० बजे गरिने तय भएको शपथ कार्यक्रम गठबन्धनबीच भागबन्डा नमिल्दा सारिएको हो ।
भागबन्डाबारे दलहरूबीच छलफल चलिरहेकाले शपथ ग्रहण कार्यक्रम अपराह्न ५ बजे सार्न प्रदेश प्रमुखको कार्यालयलाई अनुरोध गरिएको मुख्यमन्त्री थापाले बताए । कुन पार्टीले कुन कुन र कति मन्त्रालय लिने भनेर गठबन्धनका नेताहरू अहिले छलफलमा जुटेका छन् ।
प्रदेश प्रमुख पर्शुराम खापुङले संविधानको १६८ को उपधारा २ अनुसार कांग्रेस, माओवादी केन्द्र, एकीकृत समाजवादी र जसपाको समर्थन पाएका थापालाई मंगलवार मुख्यमन्त्री नियुक्त गरेका थिए ।
गौतमलाई आर्थिक मामिला तथा योजना मन्त्रालयको जिम्मेवारी दिइने
थापालाई मुख्यमन्त्री बनाउन कोशी प्रदेशको सभामुख पदबाट राजीनामा दिएका बाबुराम गौतमलाई आर्थिक मामिला तथा योजना मन्त्रालयको जिम्मेवारी दिइने भएको छ । सरकारको दोस्रो वरीयता दिएर गौतमलाई सरकारमा सहभागी गराउन लागिएको माओवादी केन्द्रका एक नेताले बताए ।
यसअघि पनि आर्थिक मामिला तथा योजना मन्त्रालय माओवादी केन्द्रको भागमा परेको थियो । प्रधानमन्त्री तथा पार्टी अध्यक्ष पुष्पकमल दाहाल प्रचण्डका ज्वाईँसमेत रहेका जीवन आचार्य मन्त्री थिए ।
कोशी प्रदेशका नवनियुक्त मुख्यमन्त्री थापाले आज नै मन्त्रिमण्डल विस्तार गर्दैछन् । ३ पार्टीबाट ३ जनालाई मन्त्री बनाउने उनको तयारी छ ।
कांग्रेसबाट प्रदीप सुनुवार र एकीकृत समाजवादीबाट कमल जवेगुलाई मन्त्री बनाउने तयारी छ ।
