नेकपा एमालेका अध्यक्ष केपी शर्मा ओलीले आफूहरू संसद् अवरोधको पक्षमा नभए पनि सरकारले नै सभामुखलाई बैठक सार्न दबाब दिएको आरोप लगाएका छन् । बुधवार एमाले केन्द्रीय कार्यालयमा तुल्सीलाल अमात्यको स्मरणमा आयोजित कार्यक्रममा ओलीले संसद् अवरोध खोल्न सत्ता पक्ष नै तयार नभएको आरोप लगाएका हुन । 

बालुवाटारमा भएको सहमति बानेश्वरमा पुगेर तोडेको भनेर आरोपित गरिएको ओलीले दाबी गरे । ‘सरकारले सभामुखलाई दबाब दियो, सूचना टाँसेर बैठक स्थगित गर्नु भन्दै । बालुवाटारमा भएको सहमति संसदमा आउँदा ओलीले छाड्दिओ भनेर भन्छ’ ओलीले भने । 

एमालेले अवरोध गर्ने चेतावनी दिएपछि सोमवार र मंगलवारका लागि निर्वारित प्रतिनिधि सभा बैठक सूचना मार्फत स्थगित गरिएको थियो । 

ओलीले सुन तस्करी सम्बन्धमा भरपर्दो छानबिन हुनुपर्ने आफूहरूको माग गरेको बताए । ओलीले सुन तस्करी सम्बन्धमा चुइक्क नबोलेको भन्दै कांग्रेस सभापति शेरबहादुर देउवाको आलोचना गरे । ‘अचम्मको कुरा के हो भने नेपाली कांग्रेस चुँ गर्न सक्दैन, चुइक्क बोल्न सक्दैन । देउवाजी तपाईले क्विन्टल सुन तस्करी भएको सुन्नु भएको छैन ? के छ तपाईंको विचार ?’ ओलीले प्रश्न गरे ।