१२ साउन २०८३, मंगलबार
प्रमुख प्रतिपक्षी दल नेकपा एमालेको अवरोधका कारण प्रतिनिधिसभा बैठक शुक्रवारसम्मका लागि स्थगित भएको छ ।
विमानस्थल भन्सार कार्यालय बाहिरबाट समातिएको एक क्विन्टल सुन सम्बन्धमा उच्चस्तरीय छानबिन समितिको माग गर्दै एमाले सांसदहरूले अवरोध गरेपछि बैठक शुक्रवारसम्मका लागि स्थगित भएको हो ।
बुधवार बसेको बैठकको शुरूमै एमाले सांसदहरू उठेर विरोध जनाए । त्यसपछि सभामुख देवराज घिमिरेले एमाले सांसद सूर्य थापालाई बोल्न समय दिए ।
थापाले बोल्न शुरू गरेपछि सत्तापक्षका सांसदहरू उठेर बोल्न समय माग गरेका थिए ।
त्यसपछि संसद्मा एकछिन होहल्ला भयो । थापाले छानबिन समिति गठनको माग गरेका थिए ।
त्यसपछि सभामुख घिमिरेले शुक्रवार दिउँसो १ बजेसम्मका लागि बैठक स्थगित गरे ।
सुन तस्करी सम्बन्धमा छानबिनको माग गर्दै एमालेले साउन १० देखि प्रतिनिधिसभा बैठक अवरुद्ध गर्दै आएको छ ।
सुन तस्करीको छानबिन सम्बन्धमा गृहमन्त्री नारायणकाजी श्रेष्ठले हिजो संसद्मा सम्बोधनमार्फत सरकारका तर्फबाट प्रतिबद्धता जनाए पनि एमालेले अवरोध कायम राखेका छ ।
गृहमन्त्री श्रेष्ठले सीआईबीले गरेको छानबिन निष्कर्षमा पुग्न नसके छानबिन समिति गठन गर्न सकिने संसद्मा स्पष्ट पारेका थिए ।
