२४ जेठ २०८३, आइतबार
नेपाल नागरिक उड्डयन प्राधिकरणले बक्यौता नतिर्ने वायुसेवाहरूको उडान रोक्ने निर्णय गरेको छ । प्राधिकरणको बिहीवार बसेको सञ्चालक समिति बैठकले बक्यौता रहेका सबै वायुसेवाको उडानमा रोक लगाउने निर्णय गरेको हो ।
नेपाल नागरिक उड्डयन प्राधिकरणका प्रवक्ता जगन्नाथ निरौलाका अनुसार पटक–पटक ताकेता गर्दा पनि बक्यौता तिर्न बेवास्ता गरेका कारण उडानमै रोक लगाउने निर्णय भएको हो ।
‘बिहीवार प्राधिकरणले निर्णय गरेको छ । अब सम्बन्धित वायुसेवालाई पत्रमार्फत जानकारी गराएर शुक्रवारदेखि नै उडानमा रोक लगाउन सकिन्छ,’ उनले लोकान्तरसँग भने ।
आन्तरिक वायुसेवामा सबैभन्दा बढी बक्यौता राख्नेमा सिम्रिक एयरलाइन्स रहेको छ । यो वायुसेवाले ५५ लाख रुपैयाँ तिरेको छैन ।
सबैभन्दा बढी पैसा बक्यौता भएको र बैंक तथा वित्तीय संस्थामा दायित्व बढी भएको यो वायुसेवाले उडान सुरक्षामा पनि लापरबाही गरेको पाइएकाले यसको उडान भने शुक्रबारबाटै रोकिने प्राधिकरणले जनाएको छ ।
यसले उडान सुरक्षामा पार्नसक्ने गम्भीर असरलाई दृष्टिगत गरेर उडानमा रोक लगाएको प्राधिकरणले बताएको छ । अन्य वायुसेवाको हकमा पनि उडान रोक लगाउँदै जाने निर्णय भएको प्राधिकरणले जानकारी दिएको छ ।
प्राधिकरणका अनुसार बक्यौता बाँकी राख्नेमा सौर्य, समिट, यतीसहितका वायुसेवा समेत छन् ।
आन्तरिक उडानका हेलिकप्टर तथा फिक्स विङ्ग्सका वायुसेवाले प्राधिकरणलाई तिर्नुपर्ने बक्यौता नतिरेका कारण पनि प्राधिकरणले बाध्य भएर कडा निर्णय लिनुपरेको पनि निरौलाले बताए ।
सिम्रिक एयरका सञ्चालक वायुसेवा सञ्चालक संघका अध्यक्ष रामेश्वर थापा हुन् । सिम्रिकसँग हाल ४ वटा हेलिकप्टर छ । यस अघि पर्यटन मन्त्रालयबाट काभ्रेमा हेलिकप्टरको लागि मात्रै उडान तथा अवतरण गर्ने विमानस्थल (हेलिपोर्ट) बनाउन सिम्रिकले अनुमति लिएको थियो ।
मन्त्रालयको उक्त अनुमतिलाई प्राधिकरणले नै कानून संगत नभएको भन्दै खारेज गरिदिएको थियो ।
यस्तो छ सिम्रिक एयरको बक्यौता रकमको विवरण
