नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले देशको अर्थतन्त्र गम्भीर बन्दै गएकोमा चिन्ता व्यक्त गरेका छन् । 

उनले घरबेटीले बहाल उठाउन नसक्ने र डेरामा बस्नेले भाडा तिर्न नसक्ने अवस्था आउन सक्ने बताए । 'अर्थतन्त्र डरलाग्दोगरी ओरालो लाग्दै छ । नेपालीहरूको आम्दानीले केही गर्न नसकिने अवस्था आउँदै छ,' उनले भने, 'डेराबाट जसले आम्दानी गरिरहेको छ त्यो आम्दानीले केही समयपछि काम गर्न छोड्छ । डेरा भाडा बढाउन सक्ने स्थिति छैन । जसले तिरिरहेको छ उसको आम्दानीले तिर्न पुग्दैन । भोलि भयावह स्थित आउँदै छ । हामी सबै गम्भीर हुन जरूरी छ ।'

आइतवार पार्टी कार्यालयमा आयोजित पत्रकार सम्मेलनमा ओलीले निर्माण व्यवसायीहरू भुक्तानी पाउन आन्दोलन गर्नुपर्ने अवस्था आउनु गम्भीर भएको बताएका हुन् । 'निर्माण व्यवसायीहरूले काम गरेको पैसा मागिरहेका छन् । सरकार दिन सक्दैन । यस्तो अवस्था छ,' उनले भने, 'यसै स्थितिबाट देश अगाडि बढ्न सक्दैन ।' 

अर्थतन्त्रको समस्या समाधान गर्नेतर्फ सरकार उदासीन बनेको ओलीले आरोप लगाए ।