२२ जेठ २०८३, शुक्रबार
बागलुङकी सिम्रन परियारले एक साताको काठमाडौं बसाइमा १४ वटा गीतमा स्वर दिइन् । त्यसमध्ये आधा गीतहरू युट्युबमा सार्वजनिक भइसकेका छन् । सार्वजनिक गीतहरूले युट्युबमा राम्रो भ्युज पाइरहेका छन् । तीन वटा गीत त युट्युब ट्रेन्डिङमा संगीततर्फ क्रमशः पहिलो, दोस्रो र तेस्रो नम्बरमा छन् ।
‘उस्लाई पाउन २’ फिमेल भर्सन आइतवार दिउँसोसम्ममा २७ लाख बढी भ्युज पाउँदै संगीततर्फ ट्रेन्डिङको पहिलो नम्बरमा छ । त्यस्तै, ‘पानी परेको’ फिमेल भर्सनले १३ लाख भ्युज पाउँदै संगीततर्फ ट्रेन्डिङको दोस्रो नम्बरमा स्थान बनाएको छ ।
त्यस्तै, ‘ए साइँला परेली भित्र’ बोलको गीत ट्रेन्डिङको तेस्रो नम्बरमा छ ।
सञ्चारकर्मी भोजराज थापाको युट्युब अन्तवार्ताको क्रममा गायकीका कारण सामाजिक सञ्जालमा प्रशंसा पाएपछि सिम्रनले काठमाडौं आएर गीत गाउने अवसर पाएकी थिइन् ।
उनले खेम सेञ्चुरीदेखि नरेश खाती लगायतसँग गाएका केही गीतहरू सार्वजनिक हुन बाँकी नै छन् । सिम्रन बागलुङमा कक्षा १२ अध्ययनरत छिन् ।
काठमाडौंमा रहँदा उनलाई एकपछि अर्को गीतको अफर आइरहेका थिए । यद्यपि, उनी पढाइ छुट्ने भएकाले अफर आएका गीतहरू समेत छाडेर गत बिहीवार घर फर्किएकी हुन् ।
