०२ साउन २०८३, शनिबार
तेहरान– इरानले महसा अमिनीका वकिलमाथि मुद्दा चलाएको छ । गत सेप्टेम्बरमा मृत्यु भएकी इरानी कुर्द युवती महासा अमिनीका वकिलमाथि ‘प्रणालीविरुद्ध दुष्प्रचार’ गरेको आरोपमा मुद्दा चलाइएको हो ।
इरानी पत्रिका इतेमाद दैनिकले वकिल सालेह निकबख्तमाथि ‘प्रणालीविरुद्ध दुष्प्रचार’ गरेको आरोप लगाइएको अधिकारीलाई उद्धृत गरी जनाएको छ ।
‘पहिलो सुनुवाइ मङ्गलबार भएको थियो र उहाँलाई विदेशी र स्थानीय सञ्चारमाध्यसँग विशेष गरी महसा अमिनी प्रकरणको बारेमा बोलेकोमा शासनविरोधी प्रचार गर्ने गतिविधि गरेको आरोपबारे सूचित गरिएको थियो,’ विज्ञप्तिमा भनिएको छ ।
गत सेप्टेम्बर १६ मा २२ वर्षीया अमिनीको हिरासतमा मृत्यु भएको करिब एक वर्षपछि निकबख्तको मुद्दा सुरु भएको थियो । दोषी ठहरिएमा उनलाई एकदेखि तीन वर्षसम्मको जेल सजाय हुन सक्छ ।
इटेमादका अनुसार निकबख्तका वकिलले उनलाई सफाइ दिन आग्रह गर्दै अन्तर्वार्तामा उनले ‘अधिकारीहरूद्वारा देश सञ्चालनको शैलीको आलोचना मात्र गरेको’ बताएका छन् ।
सेप्टेम्बर २०२२ को अन्त्यमा, निकबख्तले अमिनी परिवारले उनलाई पक्राउ गर्ने प्रहरी अधिकारीविरुद्ध उजुरी दर्ता गरेको सङ्केत गरेका थिए ।
तेहरानले विदेशी सरकारहरूले उक्साएको ‘दङ्गा’को संज्ञा दिएको अमिनी प्रदर्शनका क्रममा मारिएका सयौं व्यक्तिहरूमध्ये दर्जनौं प्रहरी अधिकारीहरू पनि थिए ।
अधिकारीहरूले हजारौं प्रदर्शनकारी र उनीहरूका समर्थकहरूलाई पक्राउ गरेका छन् ।
पश्चिमी कुर्दिस्तान प्रान्तबाट आएका निकबख्तले आफ्नो लामो सेवाको दौडान धेरै इरानी व्यक्तित्वहरूको प्रतिनिधित्व गरेका छन् । जसमध्ये प्रशंसित फिल्म निर्देशक जाफर पानाही पनि समावेश छन् । –रासस
