गायक एवं सर्जक प्रकाश सपूतको ‘सकम्बरी’बोलको गीत एक सातामै युट्युबमा करोड क्लबमा प्रवेश गरेको थियो । निकै चर्चा र आलोचनाकाबीच यो गीतले छोटो समयमा करोड भ्युज पाउने गीतको कीर्तिमान कायम गर्न सफल रह्यो । 

चार महिनाअघि सार्वजनिक यो गीतको युट्युब भ्युज अहिले पाँच करोडको नजिक पुगिसकेको छ । 

त्यसपछि प्रकाशले सार्वजनिक गरेको ‘दमाई महाराज’लाई करोड क्लबमा पुग्न भने डेढ महिना लागेको छ । 

‘दमाई महाराज’ आइतवार बिहान मात्रै करोड क्लबमा प्रवेश गरेको छ। उसो त यो गीतको सुरुवाती चर्चा राम्रै थियो । गीतले सुरुवाती दिनमा राम्रो भ्युज पाउनुका साथै युट्युब ट्रेन्डिङको शीर्षस्थानमा समेत कब्जा जमाएको थियो । 

तर, ‘गलबन्दी र बोल माया २’का रुपमा ल्याएको यस सिर्जना पहिलेको जस्तो भने नभएको स्रोता–दर्शकले प्रतिक्रिया दिएका थिए । 

गायक प्रकाश यतिबेला फेरि अर्को सिर्जना ल्याउने तयारीमा छन् ।

‘जाले रुमाल फाट्यो’बोलको गीत ल्याउने तयारी गरेको प्रकाशले जानकारी दिएका छन् ।