विष्णु माझीका पाँच ‘रेकर्ड’

नेपाली लोकदोहोरी क्षेत्रकी चर्चित गायिका विष्णु माझी तीज विशेष गीतका कारण पनि चर्चामा रहन्छिन् । त्यसैले त धेरैले ‘विष्णु माझीको गीत नआउँदासम्म तीज आएजस्तो नलाग्ने’ बताउँछन् । २०६१ सालदेखि हरेक वर्ष तीजमा आफ्नै म्युजिक कम्पनीमार्फत निरन्तर गीत ल्याउँदै आएकी उनले यस वर्ष पनि निरन्तरता दिइन् ।

यद्यपि, तीजमा मात्र नभएर समग्र लोकदोहोरी र कलाकारिता क्षेत्रमै विष्णु माझीले छुट्टै खालका रेकर्ड कायम गरेकी छन् । यहाँ विष्णु माझीका पाँच वटा अलग्गै खालका रेकर्डबारे जानकारी दिँदैछौँ । 

१. सबैभन्दा धेरै हेरिएको गीत

लोकदोहोरीमा सबैभन्दा धेरै हेरिएको गीत हो, सालको पातको टपरी । पाँच वर्षअघि सार्वजनिक यो गीतमा विष्णु माझी र कुलेन्द्र विश्वकर्माको स्वर छ । यसको भिडियोको भ्युज ९ करोड नजिक पुगिसकेको छ । यसर्थ लोकदोहोरीमा सबैभन्दा धेरै भ्युज पाउने गायिकामा पर्छिन् विष्णु माझी । 

नम्बर २. सार्वजनिक रुपमा नदेखिएरै लोभलाग्दो ख्याति 

विष्णु वर्षौदेखि सार्वजनिक रुपमा कतै देखिएकी छैनन् । गीत गाउन रेकर्डिङ स्टुडियो जाँदा पनि कसैले सुइँको पाउँदैनन् । सामाजिक सञ्जालमा उनका तस्वीरहरू पनि सार्वजनिक हुँदैनन् । सार्वजनिक जीवनमा गुमनाम भएरै पनि यो खालको लोभलाग्दो ख्याति कमाउने उनी नेपालकी एकमात्र गायिका हुन् । 

नम्बर ३. महँगो पारिश्रमिक लिने गायिका

गायिका विष्णु सबैभन्दा महँगो पारिश्रमिक लिने गायिका हुन् । उनले नेपालमा चलेका लोकदोहोरी गायक÷गायिकाले लिने पारिश्रमिक भन्दा १० गुणा बढी पारिश्रमिक लिएर थुप्रै गीत गाएकी छन् । उनलाई २ लाख रूपैयाँ दिएर गीत गाउन दिएकाहरू साङ्गीतिक क्षेत्रमा थुप्रै भेटिन्छन् । पछिल्लो समय विष्णुको पारिश्रमिक बढेको चर्चा छ, तर उनले  ३÷४ लाख रूपैयाँ दिन्छु भन्दा पनि गीत नगाउने गरेको कलाकारहरू बताउँछन् । 

नम्बर ४. वर्षौदेखि हरेक वर्ष निरन्तर तीज गीत ल्याउने गायिका

विष्णु माझीले विगत १९ वर्षदेखि आफ्नै कम्पनी सपना म्युजिक इन्डष्ट्रिजबाट तीज गीत ल्याउँदै आएकी छिन् ।

यसवर्ष पनि उनले ‘पुलतीको भट्टी भाग १९’का रुपमा ‘बलमा...’शीर्षकको गीत ल्याएकी छिन् । नेपालमा यसरी वर्षौदेखि हरेक वर्ष तीज गीत ल्याउने गायिका बिरलै छन् । 

नम्बर ५. तीज गीतमा धेरै भाग ल्याउने गायिका

तीज गीतमा धेरै भाग ल्याउने गायिका पनि हुन विष्णु माझी । उनले हरेक वर्ष ‘पुतलीको भट्टी’को नयाँ–नयाँ भाग ल्याउँदै आएकी छिन् । गतवर्ष उनले ‘पुतलीको भट्टी’ भाग १८ का रुपमा ‘चरी जेलैमा २’शीर्षकको तीज गीत सार्वजनिक गरेकी थिइन् । यसवर्ष उनले ‘पुतलीको भट्टी’ भाग १९ का रुपमा ‘बलमा...’गीत सार्वजनिक गरेकी हुन् । 

यसअघि प्रजापति पराजुली, पुरुषोत्तम न्यौपाने, हरिदेवी कोइराला, बीमाकुमारी दूरा, लक्ष्मी न्यौपाने लगायतका गायक–गायिकाले तीज गीतको विभिन्न भाग सार्वजनिक गरिसकेका छन् । तर, निरन्तर रुपमा यति धेरै भागसम्म अरु कुनैपनि तीज गीत सार्वजनिक भएका छैनन् । तीज मात्र होइन, अन्य कुनै पनि गीत यति लामो सँस्करणसम्म आएका छैनन् ।