अख्तियार दुरुपयोग अनुसन्धान आयोगले सिरहाको नापी कार्यालय, लहानमा कार्यरत अमिन (करार) दीपरन्जन यादवविरुद्ध भ्रष्टाचार मुद्दा दायर गरेको छ ।

गत भदौ ६ गते १० हजार रुपैयाँ घुस रकमसहित पक्राउ परेका यादवविरुद्ध मंगलवार विशेष अदालत काठमाडौंमा मुद्दा दायर गरिएको आयोगले जनाएको छ ।

आयोगका प्रवक्ता भोला दाहालका अनुसार यादवले जग्गाधनी पुर्जा बनाउने प्रयोजनका लागि सेवाग्राहीसँग घुस मागेका थिए ।

आयोगको बर्दिवास कार्यालयबाट खटिएको टोलीले उनलाई सेवाग्राहीबाट लिएको घुस रकमसहित रङ्गेहात पक्राउ गरेको थियो ।

१० हजार रुपैयाँ बिगो कायम गरी सोही बराबरको जरिवाना र कैद सजायको माग गर्दै अदालतमा मुद्दा दायर गरिएको आयोगले जनाएको छ ।