०६ असार २०८३, शनिबार
नेपाल सैनिक श्रीमती संघको आयोजनामा हुने ‘वरदान सुर–सन्ध्या’ कार्यक्रमको सम्पूर्ण तयारी पूरा भएको छ ।
फरक क्षमता भएका बालबालिकाको सहयोगार्थ आर्मी अफिसर्स क्लबमा शुक्रवार हुने विशेष कार्यक्रमको तयारी पूरा भएको आयोजकले जनाएको छ ।
आयोजकका अनुसार कार्यक्रममा विभिन्न ख्यातिप्राप्त कलाकारहरूले प्रस्तुति दिनेछन् । त्यसका लागि सबै टिकट बिक्री भइसकेको आयोजकले जनाएको छ ।
कार्यक्रममा स्ट्यान्ड अप कमेडीका गुरु मानिने मनोज गजुरेलको प्रस्तुति रहनेछ ।
कार्यक्रमलाई मनोरञ्जनात्मक बनाउन चर्चित अभिनेता प्रदीप खड्का र अभिनेत्री स्वस्तिमा खड्काले पनि प्रस्तुति दिनेछन् । उक्त कार्यक्रममा सदाबहार सुन्दरीका नामले परिचित अभिनेत्री करिश्मा मानन्धरको पनि प्रस्तुति रहनेछ ।
सेवा नै परम् धर्म, सेवा नै परम् तप हो भन्ने आदर्श बोकेको श्रीमती संघले प्रबन्ध लिभेन्स स्टुडियोसँगको सहकार्यमा कार्यक्रमको आयोजना गरिएको हो । कार्यक्रमको निर्देशन एलिस कार्कीले गरेका छन् ।
सैनिक श्रीमती संघले यसअघि पनि विभिन्न सामाजिक काम गर्दै आएको छ ।
बलिउड कलाकार सोनाक्षी सिन्हालाई नेपालमा ल्याएर गरेको कार्यक्रमबाट संकलित रकम पनि एकीकृत वस्तीमा दिने कार्य सैनिक श्रीमती संघले गरेको थियो ।
सामाजिक सेवाका लागि रकम संकलन गर्ने र विविध क्षेत्रमा सक्रिय संघ संस्थालाई प्रदान गर्दै आएको सैनिक श्रीमती संघले जानकारी दिएको छ ।
गिरान्चौर एकीकृत बस्ती निर्माणका लागि १४ लाख रुपैयाँ हस्तान्तरण गरेको थियो । धुर्मुस सुन्तली फाउन्डेसनका अध्यक्ष सीताराम कट्टेल ‘धुर्मुस’ र कोषाध्यक्ष कुञ्जना घिमिरे ‘सुन्तली’लाई संघले उक्त सहयोग रकम हस्तान्तरण गरेको थियो ।
त्यस्तै शीतलहरमा न्यानो कपडा वितरण, बहिरा विद्यालयमा खाद्यान्न र कपडा वितरण, अस्पतालमा स्वास्थ्य सामग्री वितरणलगायतका विभिन्न सामाजिक काममा श्रीमती संघको सक्रियता रहँदै आएको छ ।
