११ साउन २०८३, सोमबार
प्रधानमन्त्री पुष्पकमल दाहाल प्रचण्ड आज (शनिबार) चीन पुगेका छन् । संयुक्त राष्ट्रसंघको महासभामा भाग लिएर शुक्रबार न्युयोर्कबाट प्रस्थान गरेका प्रधानमन्त्री प्रचण्ड शनिबार बिहान चीनको हाङचौं शहरमा पुगेका हुन् ।
हाङचौंको अन्तर्राष्ट्रिय विमानस्थलमा चिनियाँ खेलकुद मन्त्री तथा ओलम्पिक कमिटीका अध्यक्ष गाओ जीदानसहित चिनियाँ अधिकारीहरू र चीनस्थित नेपाली राजदूत विष्णुपुकार श्रेष्ठले प्रधानमन्त्री प्रचण्डलाई स्वागत गरे ।
प्रचण्ड आजै एसियाली खेलकुद महोत्सवमा उद्घाटन समारोहमा सहभागी हुने कार्यक्रम छ । यस्तै उनले चिनियाँ राष्ट्रपति सी चिनफिङसँग भेटवार्ता गर्ने कार्यक्रम तय भएको छ ।
प्रचण्डले असोज ८ गते बेइजिङमा समकक्षी ली छियाङ्सँगसमेत भेटघाट तथा द्विपक्षीय वार्ताको कार्यक्रम रहेको छ । उनले बेइजिङको पनि भ्रमण गर्नेछन् ।
भ्रमणमा कोभिडको कारण नियमित हुन नसकेका द्विपक्षीय व्यापार नाका र परम्परागत सीमा नाकाहरू खोल्ने विषयमा समेत कुराकानी हुनेछ ।
राष्ट्रसंघको महासभामा सहभागी हुन प्रचण्ड गत भदौ ३० गते न्युयोर्क गएका थिए । न्युयोर्कबाटै चीन भ्रमणमा गएका प्रचण्ड असोज १३ गते शनिबार स्वदेश फर्किने कार्यक्रम छ ।
