एमाले बागमती प्रदेश अधिवशेनअन्तर्गत नेतृत्व चयनका लागि मतदाता नामावली प्रकाशन भएको छ ।

ललितपुरको च्यासलस्थित पार्टी मुख्यालय परिसरको तुलसीलाल स्मृति प्रतिष्ठानमा मतदाता नामावली प्रकाशन भएको हो ।

बागमतीको प्रदेश अधिवेशनमा साढे ११ सय हाराहारी प्रदेश प्रतिनिधि छन् ।

अब साढे ११ बजेपछि उम्मेदवारी मनोनयनका लागि फाराम वितरण गर्ने कार्यक्रम छ । उम्मेदवारी दर्तापछि दिउँसो ४ बजे अन्तिम नामावली प्रकाशन गर्ने तयारी निर्वाचन कमिटीको छ ।

मतदान भने भोलि बिहान ८ बजेबाट शुरू हुने जनाइएको छ । एमालेले विद्युतीय मशिनबाट मतदानको प्रबन्ध मिलाएको जानकारी अध्यक्ष मण्डलका सदस्य रामेश्वर फुयाँलले दिए ।

निर्वाचन गर्ने प्रयोजनका लागि मंगलवार एमालेले गुरु बरालको नेतृत्वमा ११ सदस्यीय अध्यक्ष मण्डल चयन गरेको थियो ।  

एमाले बागमतीमा अध्यक्ष, उपाध्यक्ष, सचिव एक-एक र सह-सचिव २ सहित २४० सदस्यीय कमिटी निर्वाचित हुनेछ । 

नेताहरूले अन्तिमसम्मै सहमतिको प्रयास गर्ने बताएका छन् । तर, अध्यक्षमा रामेछापका कैलाश ढुंगेल र मकवानपुरका कृष्ण दाहाल मुख्य दाबेदार देखिएका छन् ।

सोमवार उद्घाटन भएको अधिवेशनमा मंलगलबार बन्द सत्रमा अध्यक्ष केशवराज पाण्डेले प्रतिवेदन पेश गरेका थिए ।

प्रतिवेदन गए राति पारित गरेपछि निर्वाचनको प्रक्रिया आज बिहानबाट शुरू भएको हो ।