नेकपा एमाले कोशी प्रदेश कमिटीको निर्वाचनमा अध्यक्ष केपी शर्मा ओलीको निर्देशन विपरीत प्यानल बनेको छ । ओलीले प्यानल बनाउन निर्देशन दिए पनि त्यसविपरीत उनी निकटकै नेताले प्यानल बनाएका हुन् । 

ओलीले ग्रिन सिग्नल दिएका अध्यक्षका उम्मेदवार घनश्याम खतिवडा समूहले प्रतिनिधिहरूलाई एसएमएसमार्फत भोट हाल्ने उम्मेदवारको नाम नै पठाएको छ । खतिवडाको प्यानलको उपाध्यक्षमा टिकाराम चेम्जोङ छन् । यस अगाडि पनि चेम्जोङ उपाध्यक्ष नै थिए । 

यसैगरी सचिवमा राजकुमार भण्डारीलाई उनले प्यानलमा अगाडि सारेको छन् भने उपसचिवमा गौरादह नगरपालिकाकी उपप्रमुख जल वर्षा राजवंशी र खोटाङका देवान थेबे खतिवडाको नाम  छ । 

खतिवडा समूहले आफ्नो प्यानलमा यी उम्मेदवार रहेको भन्दै भोट हाल्न आग्रह गर्दै जिल्ला अध्यक्ष तथा त्यस क्षेत्रका प्रभावशाली एक नेताहरूलाई एसएमएस गरेको बताइएको छ । ‘साँझ ५ बजेतिर मोबाइलमा म्यासेज आयो,’ कोशी प्रदेश अन्तरगतको एक जिल्ला अध्यक्षले लोकान्तरसँग भने । वरिष्ठ उपाध्यक्ष ईश्वर पोख्रेललगायत संलग्नतमा प्यानल टुङ्ग्याएको एक केन्द्रीय सदस्यले बताए ।  अधिवेशन  सुरु हुनुभन्दा दुई दिन अगाडिदेखि उपाध्यक्ष ईश्वर पोख्रेल विराटनगर मै छन् । 

यसैबीच अर्का अध्यक्षका प्रत्याशी विनोद ढकालको प्यानलमा पनि उपाध्यक्ष भने टिकाराम चेम्जोङ नै छन् । उपाध्यक्षमा चेम्जोङको मात्रै उम्मेदवारी परेपछि  उनी निर्विरोध निर्वाचित हुने भएका छन् । उपसचिवमा मोरङकै खेम नेपाली र संखुवासभाका भगिश्वर गुरुङ रहेका छन् । यस्तै सचिवमा शैलेश लामाको उम्मेदवारी छ ।

 संस्थापन पक्षले म्यासेज पठाएपछि इतरहरूले पनि समूह निर्माण गरेको ढकाल निकट नेताले बताए । कोशी प्रदेशको निर्वाचनबाट पाँच पदाधिकारी सहित २१५ सदस्यीय  कमिटी चयन हुने छ । 

प्रदेश कमिटी चयनका लागि  आइतबार बिहान ११ बजेदेखि मतदान सुरु गर्ने कार्यतालिका छ । अधिवेशन अवधिमा केन्द्रीय सचिव तथा प्रदेश इन्चार्ज रघुवीर महासेठ सहित स्थायी कमिटी सदस्यहरू शेरधन राई, मुख्यमन्त्रीसमेत रहेका हिक्मतकुमार कार्की, अग्नि खरेल, डा शिवमाया तुम्बाहाम्फे र राजेन्द्र गौतम समेत विराटनगरमै छन । यस्तै केन्द्रीय सदस्य भगवती चौधरी, जगदीश कुसियैत, रामराना मगर, पर्शुराम मेघी गुरुङ र सुनीता बराल पनि विराटनगरमै रहेको नेताहरूले बताएका छन् ।