२५ जेठ २०८३, सोमबार
बझाङमा मंगलवार गएको भूकम्पका कारण खसेको पहिरोमा परी बेपत्ता भएकी एक महिलाको शव भेटिएको छ । उनको शव पुरिएको अवस्थामा बुधवार बिहान भेटिएको हो ।
मृत्यु हुनेमा जयपृथ्वी नगरपालिका–११ ओखल गाउँकी ४५ वर्षकी महिला गुनदेवी धामी रहेकी छिन् ।
टिमुर टिप्न गाउँनजिकैको जङ्गलमा गएकी ती महिलाको पहिरोमा पुरिएको अवस्थामा शव भेटिएको स्थानीय पत्रकार नरेन्द्र उपाध्यायले सामाजिक सञ्जालमार्फत जानकारी दिएका छन् ।
जिल्ला प्रहरी कार्यालय, बझाङका डीएसपी भरत शाहले लोकान्तरलाई दिएको जानकारी अनुसार शव भेटिएको खबर आएपछि अहिले प्रहरी टोली त्यसतर्फ प्रस्थान गरिसकेको छ । उक्त स्थान सदरमुकामबाट ६–७ घण्टाको दूरीमा रहेको छ ।
भूकम्पबाट बझाङमा मात्रै १३ जना घाइते भएका छन् । भूकम्पले सदरमुकाम चैनपुरसहित आसपास गाउँका केही घर, विद्यालय र वडा कार्यालय गरी अहिलेसम्म एक सय ६० भन्दा धेरै भौतिक संरचनामा क्षति पुगेको तथ्याङ्क छ ।
बझाङ केन्द्रविन्दु भएर शुरूमा दिउँसो २ बजेर ४० मिनेट जाँदा ५.३ म्याग्निच्युडको भूकम्प गएको थियो । त्यसको २६ मिनेटपछाडि ३ बजेर ६ मिनेट जाँदा ६.३ म्याग्निच्युडको भूकम्प गएको थियो ।
बझाङमा गएको भूकम्पको धक्का काठमाडौंदेखि दिल्लीसम्म महसुस भएको छ । काठमाडौंमा ३ बजेर ८ मिनेट जाँदा धक्का महसुस भएको थियो ।
