‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेका २४ घण्टाका मुख्यमुख्य घटनाक्रमसहित उपस्थित भएका छौँ–
इजरायलमा भएको आतंककारी हमलापछि त्यहाँ कार्यरत नेपाली त्रासमा रहेका छन् । निरन्तर प्यालेस्टाइनी आतंकारी समूहबाट रकेट प्रहारका साथै स्थलमार्गबाटै पनि आक्रमण हुँदा इजरायल अशान्त बनेको हो । 

आतंककारी हमलामा परी इजरायल प्यालेस्टाइनको सीमामा पर्ने गाजा क्षेत्रमा कार्यरत नेपालीहरु पनि घाइते भएका छन् । हालसम्म ९ जना घाइते भएको र उनीहरु उपचार पाउनबाट बञ्चित भएका छन् । बंकरमै घाइते अवस्थामा नेपालीहरु बस्न बाध्य भएका छन् ।

 बाहिर निरन्तर भिडन्त भइरहेकाले उद्दारमा कठिनाइ भइरहेको इजरायलस्थित नेपाली दूतावासले जनाएको छ । हाल दुई जना अस्पताल पुग्न सफल भएपनि अन्यको भने उपचार हुन नसकेको हो । उनीहरुलाई अस्पताल लैजानका लागि निरन्तर पहल भइरहेको अस्पतालको भनाइ छ ।

बंकर छिर्ने क्रममा गोली तथा रकेटको छर्रा लागेका उनीहरुमध्ये केहीको अवस्था गम्भीर रहेको बताइएको छ । उनीहरु घाइतेहरु कृषि प्रशिक्षार्थी कामदार रहेको बताइएको छ । कृषि प्रशिक्षार्थीको रुपमा गएका १७ मध्ये ९ जना घटनामा परेका हुन् । 
इजरायलमा २ सय ५० कृषि विद्यार्थीसहित ४ हजार ५ सय जना नेपाली कार्यरत छन् ।
००००
सरकारले इजरायलमा भएको आतङ्कवादी हमलाको निन्दा गर्दै इजरायल सरकारप्रति ऐक्यबद्धता जनाएको छ । साथै सरकारले हमलामा अमूल्य जीवन गुमेकामा तथा धेरै मानिस घाइते दुःख व्यक्त गरेको छ ।

परराष्ट्र मन्त्रालयले इजरायल सरकार तथा त्यहाँका जनताका साथै हमलामा परी जीवन गुमाएकाहरूका परिवारप्रति गहिरो सहानुभूति एवं समवेदना व्यक्त गरेको छ । नेपाल सरकारले घाइतेहरूको शीघ्र स्वास्थ्य लाभको कामना पनि गरेको छ ।
००००
कोशी प्रदेशका मुख्यमन्त्री हिक्मतकुमार कार्कीले राजीनामा दिएका छन् ।
प्रदेशसभाको बैठकलाई सम्बोधन गर्दै उनले पदबाट राजीनामाको घोषणा गरेका हुन् । यसैबीच प्रदेश प्रमुखले नयाँ सरकार बनाउन शुक्रबारसम्मको समय दिएर आह्वान गरेका छन् । 
००००
राष्ट्रपति रामचन्द्र पौडेलसँग प्रधानमन्त्री पुष्पकमल दाहालले शनिवार अपराह्न शिष्टाचार भेट गरेका छन् । 
राष्ट्रपति आवास शीतल निवासमा भएको उक्त भेटमा संयुक्त राष्ट्रसङ्घको ७८औँ महासभाका क्रममा हालै भएको आफ्नो अमेरिका र छिमेकी राष्ट्र चीनको भ्रमणबारे प्रधानमन्त्री दाहालले जानकारी गराएको राष्ट्रपतिका प्रेस सल्लाहकार किरण पोखरेलले बताए ।
००००
गत साउन ३० गते गठित गण्डकी प्रदेशसभाका विषयगत समितिले सभापतिको टुङ्गो लगाएका छन् । शनिबार चारवटै समितिको नेतृत्वमा एकल उम्मेदवारी परेपछि सभापति निर्विरोध निर्वाचित भएका हुन् ।

प्रदेशसभा सचिवालयका अनुसार सार्वजनिक लेखा समितिको सभापतिमा प्रदेशसभा सदस्य सुधिरकुमार पौडेल, अर्थ तथा विकास समितिको सभापतिमा भोजराज अर्याल, सामाजिक विकास तथा कृषि समितिको सभापतिमा फणिन्द्र देवकोटा र प्रदेश मामिला तथा कानुन समितिको सभापतिमा चम्पादेवी खड्काको उम्मेदवारी परेको थियो ।
००००
प्रधानमन्त्री पुष्पकमल दाहाल प्रचण्ड र प्रमुख प्रतिपक्ष दल नेकपा एमालेका अध्यक्ष केपी शर्मा ओलीबीच भेटवार्ता भएको छ ।
शनिबार बिहान सिंहदरबारस्थित प्रधानमन्त्री तथा मन्त्रिपरिषद्को कार्यालयमा उनीहरूबीच भेटवार्ता भएको हो ।