इजरायलमा शनिवार भएको आतंककारी हमलामा परी १० जना नेपाली नागरिकको निधन भएको छ । त्यसमध्ये धनुषाको लक्ष्मीनिया गाउँपालिका वडा नम्बर ४ सपहीका २२ वर्षीय आनन्द साह समेतको निधन भएको इजरायलका लागि नेपाली राजदूत कान्ता रेग्मीले पुष्टि गरेकी छन् ।

आनन्दको मृत्यु भएको खबर आइतबार दिउँसो ४ बजे गाउँमा फैलिएको वडाध्यक्ष रमेश कुमार साहले बताए । 'इजरायलमा हमला भएको दिन शनिवार नै आनन्दका दिदीले फोन गरेकी थिइन् । तर, फोन बजे पनि उठेको थिएन । आज आइतबार पनि उनको फोनमा रिङ जान्छ तर फोन उठेको छैन,' वडाध्यक्ष साहले लोकान्तरसँग भने,'सरकारले अहिलेसम्म उनी मारिएकोबारे परिवारका सदस्यलाई कुनै जानकारी गराएको छैन । तर, आनन्दकी बहिनीहरूले इजरायलका केही मानिससँग कुरा गर्दा आनन्दको निधन भएको कुरा आएको छ ।'

आनन्द परिवारको एक्लो छोरा हुन् । उनका तीन दिदीबहिनी छन् । 'गत भदौ २६ गतेमात्र उनी कृषिसम्बन्धी तालिम लिनका लागि गएका थिए,' वडाध्यक्ष साहले थपे,'कृषिसम्बन्धी तालिम लिन उनीसँगै नेपालका अरू २५ जना विद्यार्थीहरू गएका थिए ।' जनकपुरको एन्जलस बोर्डिङ स्कुलबाट एसईई र मिट क्याम्पसबाट आईएससी उत्तीर्ण गरेका आनन्द त्यसपछि  इजरायल पुगेका थिए ।

घर परिवारका कुनै पनि सदस्य अहिले बोल्ने अवस्थामा छैनन् । आनन्दका बुवा सोमन साहले जसोतसो छोरालाई पढाएका थिए । 'आनन्द निकै मिहिनेती र राम्रो विद्यार्थी थिए । उनको घर परिवारको आर्थिक अवस्था राम्रो छैन,' वडाध्यक्ष साहले थपे,'पढेर र इजरायलबाट तालिम लिएर आएपछि गाउँमै केही गर्छ भन्ने सपना बुबाले बोकेका थिए ।' 

आमा, बुबा सबै आनन्दको घटनाबारे सुनेर मुर्छित भएका छन् । अहिले सिंगो गाउँ नै शोकमा डुबेको साहले बताए । 'दुई दिनअघि शुक्रवार आनन्दसँग उनका बहिनीहरूले फोनमा कुराकानी गरेका थिए । तर त्यो दिन उनको आमा बुवासँग कुरा हुन सकेको थिएन,' साहले थपे,'शनिवार आमा बुवासँग कुरा गर्छु भनेका आनन्दसँग कुरा गर्न आमा बुबाले शनिवार देखि नै फोन गरे पनि फोन त बजेको छ । तर आज आइतबार सम्म पनि फोन उठेन । '

परिवारको एक्लो छोराको विदेसिएको २६ दिनपछि निधन भएको खबरसँगै परिवारमा वज्रपात भएको छ ।