राष्ट्रिय स्वतन्त्र पार्टी (रास्वपा)ले मंगलबारका लागि तय भएका सम्पूर्ण पूर्वनिर्धारित कार्यक्रमहरू स्थगित गर्ने निर्णय गरेको छ । इजरायलमा प्यालेस्टानको हमास समूहको आक्रमणमा परी १० जना नेपालीले मृत्यु भएपछिको राष्ट्रिय शोकको अवस्थालाई मध्यनजर गर्दै सबै कार्यक्रमहरु स्थगित गरिएको हो । 
सोमबार पार्टीको संसदीय दलको कार्यालय सिंहदरबारमा बसेको बैठकले  यस्तो निर्णय गरेको दलका  प्रमुख सचेतक सन्तोष परियारले बताए । इजरायलमा उद्दारको पर्खाइमा धेरै नेपााली रहेकोले प्रभावकारी कूटनीतिक पहल गर्न समेत बैठकले सरकारको ध्यानाकर्षण गराएको छ । 

 इजरायलको घटनाले सम्पूर्ण नेपालीहरू शोकमा परेको बताउँदै  राष्ट्रिय स्वतन्त्र पार्टीले यो घटनाको घोर भर्त्सना गर्ने निर्णय गरेको पनि परियारले बताए । प्रधानमन्त्री कार्यालयमा बसेको सर्वदलीय बैठकमा पार्टी सभापति रवि लामिछानेले घटनाका घाइते तथा अलपत्र परेकाहरुको उद्धारमा सरकारलाई महत्त्वपूर्ण सुझाव दिएको पनि उनले बताए ।  साथै पार्टीले यही असोज २९ र ३० गते नीति मन्थन कार्यशाला गर्ने निर्णय गरेको परियारले जानकारी दिए ।