२९ जेठ २०८३, शुक्रबार
उपप्रधान एवं गृहमन्त्री नारायणकाजी श्रेष्ठले भूकम्पबाट प्रभावित जनतालाई सहयोगमा कुनै कमी हुन नदिइने बताएका छन् ।
विभिन्न राहत सामग्रीसहित मन्त्री र सांसद टोलीको नेतृत्व गर्दै भूकम्प प्रभावितको उद्धार, खानपिन, बसोवास, राहत तथा उपचारबारे जानकारी लिन जाजरकोट सदरमुकाम खलंगा पुगेका मन्त्री श्रेष्ठले यस्तो बताएका हुन् ।
सुरक्षा संयन्त्र र जनप्रतिनिधिलाई सदरमुकाम र गाउँ दुवैतिर उत्तिकै परिचालित हुन पनि उनले निर्देशन दिएका छन् ।
उद्धारको काम लगभग सकिएकोले अब राहत, बसोवास, खानपिन र उपचारमा केन्द्रित हुनु जरुरी रहेको उपप्रधानमन्त्री श्रेष्ठले बताए ।
पीडित र प्रभावित परिवारहरूले सरकारले तत्काल उद्धार पहल गरेर राज्य हुनुको अनुभूति दिलाएको उनको भनाइ थियो ।
प्रधानमन्त्री पुष्पकमल दाहाल ‘प्रचण्ड’ स्वयं नै शनिवार जाजरकोट र रुकुम पश्चिम आएर सुरक्षाकर्मीसहित उद्धारमा खटिएकोप्रति स्थानीयले सराहना गरेका थिए ।
पीडित र प्रभावितको समग्र जानकारी लिएपछि उपस्थितहरूलाई सम्बोधन गर्दै उपप्रधानमन्त्री श्रेष्ठले नगद एवं जिन्सी राहत वितरण, खानपिन, बसोवास र उपचारमा कुनै कमी हुन नदिइने तथा पुनर्निर्माणको योजना तत्काल बनाइने समेत बताएका थिए ।
उपप्रधानमन्त्री श्रेष्ठ नेतृत्वको टोली यसपछि पश्चिम रुकुम पुग्नेछ। टोलीमा भौतिक पूर्वाधार तथा यातायातमन्त्री प्रकाश ज्वाला, स्वास्थ्यमन्त्री मोहनबहादुर बस्नेत, उर्जामन्त्री शक्ति बस्नेत, सांसद एवं माओवादी केन्द्रका उपमहासचिव जनार्दन शर्मा लगायत छन् ।
