‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेका २४ घण्टाका मुख्यमुख्य घटनाक्रमसहित उपस्थित भएका छौँ–

मुलुक संघीयतामा गए पनि जिल्लाका सीडीओ र कर्मचारी खटाउन आफूहरूले नपाउने भएपछि प्रदेशका मुख्यमन्त्रीहरू सधैं जसो केन्द्रसँग असहमत हुँदै आएका छन् । यसैले बिहीवार प्रहरी समायोजन ऐन, संघीयता निजामती ऐन कार्यान्वयनसहितका ६ बुँदे माग राख्दै मधेश प्रदेशका मुख्यमन्त्री सरोजकुमार यादवले प्रधानमन्त्रीलाई ज्ञापनपत्र नै बुझाए ।

मधेसमात्रै होइन कोशीका मुख्यमन्त्री केदार कार्कीले पनि प्रदेशको अधिकारको लागि सिंहदरबारमा नै धर्ना बस्नेसम्मको चेतावनी दिए । प्रदेशसभाको बैठकमा प्रश्नोत्तर कार्यक्रममा उनले प्रदेशमा अधिकार ल्याउन आफैंले सिंहदरबारमा धर्ना दिने चेतावनी दिएका हुन् ।

यतिमात्रै होइन लुम्बिनी प्रदेशका गृहमन्त्री सन्तोष पाण्डेले पनि केन्द्रले अधिकार नदिएकोमा शुक्रवार नै रोष प्रकट गरेका छन् ।
००००
प्रधानमन्त्री पुष्पकमल दाहाल प्रचण्डले गणतन्त्रपछिका पछिल्ला १५ वर्षमा रोल्पाको मुहार परिवर्तन हुँदै गएको बताएका छन् ।

शुक्रवार दिउँसो सहिद स्मृति राजमार्गको थवाङ खोलामा निर्मित मोटरेवल पुलको उद्घाटन गर्दै प्रधानमन्त्री प्रचण्डले गणतन्त्र प्राप्तिको लडाइँमा अग्रणी योगदान गर्ने रोल्पा जिल्लालाई गणतान्त्रिक सरकारले विशेष महत्त्व दिएको बताए ।
००००
प्रधानन्यायाधीश विश्वम्भरप्रसाद श्रेष्ठले न्यायाधीश नियुक्ति प्रक्रिया छिट्टै टुङ्ग्याउने बताएका छन् । 

 सर्वोच्च अदालत बार एसोसिएसनको भवन निर्माणका लागि जग्गा भोगाधिकरणको पत्र हस्तान्तरण कार्यक्रममा प्रधानन्यायाधीश श्रेष्ठले सर्वोच्च अदालत, उच्च अदालत र जिल्ला अदालतमा बाँकी न्यायाधीश नियुक्ति प्रक्रियालाई छिट्टै टुङ्ग्याउने बताएका हुन् ।
००००
सर्वोच्च अदालतले रौतहटको मौलापुर नगरपालिका प्रमुख रीना साहको पद रिक्त भएको निर्णय कार्यान्वयन नगर्न निर्वाचन आयोगका नाममा अन्तरिम आदेश जारी गरेको छ । 

न्यायाधीश प्रकाशमानसिंह राउतको एकल इजलासले शुक्रवार साहलाई नगर प्रमुखको पदमा काम गर्न अन्तरिम आदेश जारी गरेको हो ।
००००
अख्तियार दुरुपयोग अनुसन्धान आयोगले क्षेत्रीय शिक्षा निर्देशनालय हेटौंडाका तत्कालीन कामु निर्देशक दिनेशकुमार श्रेष्ठसहित ७ जनाविरुद्ध भ्रष्टाचार मुद्दा दायर गरेको छ ।

सार्वजनिक सम्पत्तिको हानिनोक्सानी गरी भ्रष्टाचार गरेको आरोपमा निर्देशक श्रेष्ठ, जिल्ला शिक्षा अधिकारी, प्रधानाध्यापक तथा शिक्षकविरुद्ध शुक्रवार विशेष अदालत काठमाडौंमा मुद्दा दायर गरिएको आयोगले जनाएको छ ।

यसैबीच अख्तियार दुरुपयोग अनुसन्धान आयोगका पदाधिकारीहरूले भूकम्प प्रभावितलाई ७ दिनको तलब सहयोग गर्ने भएका छन् ।
००००
नेपाली सेनाका उपरथी ताराध्वज पाण्डेले राजीनामा दिएका छन् । सैनिक स्रोतका अनुसार उनले बिहीवार राजीनामा दिएका हुन् । 

पाण्डेको नागरिकतामा उमेर सच्याएको उजुरी परेको थियो । वर्तमान प्रधानसेनापति प्रभुराम शर्माको कार्यकाल सकिएलगत्तै उनी प्रधानसेनापतिको लाइनमा थिए ।
००००
मुगुको छायानाथ रारा नगरपालिका–६ मुन्दुगाउँमा एकै परिवारका ४ जनाको हत्यामा संलग्न रहेको आरोपमा दुई पक्राउ परेका छन् । 

पक्राउ पर्नेमा एक जना मृतकका मामाको छोरा तथा अर्का छिमेकी गाउँका रहेका जिल्ला प्रहरी कार्यालयका प्रहरी नायब उपरीक्षक वीरेन्द्र थापाले जानकारी दिए ।
००००
कोशी प्रदेश सभा तीन महिनादेखि सभामुखविहीन छ । तत्कालीन सभामुख बाबुराम गौतमले राजीनामा दिएपछि प्रदेश सभामुखविहीन बनेको हो । उपसभामुख सिर्जना दलनुवारले सभा सञ्चालनको जिम्मेवारी सम्हाल्दै आएकी छन् ।

२०७९ पौष २८ गते निर्विरोध निर्वाचित भएका बाबुराम गौतमले सरकारलाई बहुमत र्पुयाइदिन गत साउन १६ गते पदबाट राजीनामा दिएका थिए । कांग्रेस संसदीय दलका नेता उद्वव थापालाई बहुमत र्पुयाइदिन उनले राजीनामा राजीनामा दिएका थिए । 

तीन महिनासम्म दिँदा पनि कसैले नलिएको सभामुख पद अहिले भने सबैको रोजाइमा पर्न थालेको छ । केही महिना अगाडिसम्म एक–अर्कालाई छोड्दै आएको सभामुख पद अहिले दलहरूलाई प्रतिष्ठाको विषय बनेको छ । कोशीको संख्यात्मक गणित र विशिष्ठ परिस्थितिका कारण दलहरुले सभामुख पदलाई प्राथमिकता दिएका हुन् । 
००००
नेपाल टेलिकमले भूकम्प प्रभावित जाजरकोट र रुकुमपश्चिमसहित १९ जिल्लालाई नमूना दूरसञ्चारयुक्त जिल्ला बनाउने घोषणा गरेको छ । 

सञ्चार तथा सूचना प्रविधिमन्त्री रेखा शर्माको निर्देशनमा नेपाल टेलिकमले चालु आर्थिक वर्षको कार्यक्रममा नमूना जिल्ला कार्यक्रम तय गरेको थियो । जसअनुसार शुक्रबार टेलिकमले नमूना सेवा दिने जिल्लाको सूची सार्वजनिक गरेको हो ।
 प्रदेश राजधानी रहेका जिल्लासहित हरेक प्रदेशबाट कम्तीमा दुई जिल्ला समेटिने गरी नमूना जिल्ला कायम गर्ने घोषणा नेपाल टेलिकमले गरेको छ ।
००००
काठमाडौँ महानगरपालिकाले राष्ट्रिय सम्पत्ति जोगाउन सहयोग गर्ने प्रमुख बालेन्द्र शाहले बताएका छन् । शुक्रबार कमलपोखरीस्थित बालकृष्ण सम जन्मिएको (करिब १३० बर्ष पुरानो) भवनको निरीक्षण अवलोकन गर्दै उनले संस्कृति, परम्परा र सम्पदा बचाउने, सहरी क्षेत्रमा खुला स्थान जोगाउने र बढाउने कामलाई प्राथमिकता दिएको बताए ।
००००
फिफा विश्वकप र एएफसी एसिया कपको संयुक्त छनोटअन्तर्गत सयुंक्त अरब इमिरेट्स (यूएई) विरुद्धको खेलमा प्रतिस्पर्धा गर्ने राष्ट्रिय पुरुष फूटबल टोलीको घोषणा भएको छ ।

नेपाली राष्ट्रिय टोलीका मुख्य प्रशिक्षक भिन्सेन्जो अल्बर्टो एनेसले शुक्रवार २३ सदस्यीय नेपाली टोलीको घोषणा गरेका हुन् । अभ्यासका क्रममा घाइते भएका टोलीका अनुभवी डिफेन्डर अनन्त तामाङलाई भने टोलीमा समावेश गरिएको छैन ।
००००
दुईजना प्रहरीलाई आक्रमण गरेर कुटपिट गरी हतियार लुटपाट गर्ने ५ जना अभियुक्त पुर्पक्षका लागि कारागार चलान भएका छन्  । 
मोरङ अदालतले शुक्रवार सुनसरी र मोरङमा श्रृंखलाबद्ध लुटपाट गर्ने ५ जनाको समूहलाई पुर्पक्षको लागि थुनामा राख्ने आदेश दिएको हो ।