२५ जेठ २०८३, सोमबार
दिवंगत अभिनेता, संगीतकार तथा गायक रोबिन तामाङको सम्झनामा ‘रबिन एण्ड द न्यू रिभोल्युसन’ले काठमाडौंमा साङ्गीतिक प्रस्तुति गर्ने भएको छ ।
गायक रोबिनको निधनपछि व्याण्डले आगामी शुक्रबार काठमाडौंको दरबारमार्गस्थित क्लब प्लाटिनममा पहिलोपटक साङ्गीतिक प्रस्तुति दिन लागेको हो ।
पोजेटिभ भाइब्स इन्टरटेनमेन्ट नेटवर्क(पीभीई)को प्रस्तुतिमा हुन लागेको कार्यक्रममा साङ्गीतिक ब्याण्ड एक्सिसले पनि आफ्नो प्रस्तुति दिनेछ । एक्सिसले नेपाल टुर अन्तर्गत काठमाडौंमा पहिलोपटक ‘एक्सिस लाइभ इन काठमाडौं’मार्फत आफ्नो गीत सुनाउन लागेको हो ।
ब्याण्डले कार्यक्रममा आफ्ना चर्चित गीतहरु ‘मुस्कान’, ‘अधुरो प्रेम’, ‘मेरो प्रेम’, ‘सात समुन्द्र पारी’ र पछिल्लो रिलिज ‘पाइला’ सुनाउनेछ ।
कार्यक्रममा रोबिन एण्ड द न्यू रिभोल्युसनका सदस्यहरूसँग मिलेर अन्य गायकहरूले ‘नेपाल’, ‘भुलमा भूल्यो’, ‘केटाकेटी’, ‘दम मरु दम’, ‘चिसो चिसो’ र ‘जति माया लाए पनि’लगायतका गीत पनि सुनाउनेछन् ।
कार्यक्रमका लागि टिकटहरू ई–सेवामा उपलब्ध रहेको आयोजकले जनाएको छ । गायक रोबिनको गत असारमा निधन भएको थियो ।
