रुकुम पश्चिम हत्याकाण्डको फैसलाः यी हुन् जन्मकैदको सजाय पाउने २४ जना

रुकुम पश्चिमको चौरजहारी–८ सोती हत्याकाण्ड प्रकरणमा २४ जनाले जन्मकैदको सजाय पाएका छन् ।

रुकुम जिल्ला अदालतले मंगलवार २४ जनालाई जन्मकैदको फेसला सुनाएको हो ।

जन्मकैदको फैसला सुनाइएकामा वडाध्यक्ष डम्बरबहादुर मल्ल पनि रहेको अदालतका सूचना अधिकारी गोविन्द कोइरालाले जानकारी दिए । 

यस्तै जन्मकैदको सजाय पाउनेमा डिल्लीबहादुर ठकुरी, प्रेमबहादुर ठकुरी, सन्तोष मल्ल, मोहन पुन मगर, मानबहादुर मल्ल, टोपबहादुर मल्ल, सर्वजित भनिने सविन पुन, तिलक चन्द र इन्द्रबहादुर भनिने इदबहादुर ठकुरी छन् ।

यसैगरी लिपेन्द्रकुमार मल्ल, हर्कबहादुर मल्ल, विनोद मल्ल, नेत्रबहादुर मल्ल, रेशमबहादुर मल्ल, धनराज राना, नवीकुमार घर्तीमगर, विराज पुनमगर, भीमबहादुर पुन, रमित पुनमगर, विष्णु मल्ल र तीनजना नाम परिवर्तित  छन् । नाम परिवर्तित तीनजना घटनामा मृतक नवराजकी प्रेमिका भनिएकी किशोरीका बुवा, दाइ र भाइ छन् ।

यस्तै यस घटनामा ८ जनाले भने सफाइ पाएका छन् । सफाइ पाउनेमा फरार रहेका तुलाराम घर्ती पनि छन् ।

यस्तै, डिल्ली घर्ती, लोकेन्द्र घर्ती, सौरभ पुन, भीमबहादुर बुढा, इन्द्रबहादुर मल्ल, तुलबहादुर मल्ल र दीपेन्द्र चन्दले समेत सफाइ पाएका छन् । 

सोती गाउँमा गैरदलित प्रेमिका भगाउन खोज्दा जाजरकोटको भेरी नगरपालिका–४ रानागाउँका २१ वर्षीय नवराज विकसहित ६ जनाको हत्या भएको थियो ।

२०७७ जेठ १० गते नवराज आफ्ना साथीहरू लिएर मल्ल थरकी प्रेमिका भगाउन रुकुमपश्चिमको सोतीगाउँ पुगेका थिए ।

त्यस क्रममा सोती गाउँका गैरदलित बासिन्दाले आक्रमण गरी नवराजसहित ६ जनाको हत्या गरेका थिए ।  घटनामा १२ जना घाइते भएका थिए ।

सोती गएका नवराजसहित उनका साथीहरू सन्दीप विश्वकर्मा, टीकाराम सुनार, लोकेन्द्र सुनार, गणेश बुढा र गोविन्द शाहीको सामूहिक हत्या गरिएको थियो । 

अदालतले नवराजकी प्रेमिका र उनकी आमालाई जातीय छुवाछुतमा दुई वर्ष कैद र ५० हजार रुपैयाँ जरिवानाको फैसला गरेको छ । 

न्यायाधीश खड्गबहादुर केसीको इजलासले यस्तो फैसला गरेको हो । 

रुकुम पश्चिम हत्याकाण्डको फैसलाः यी ८ जनाले पाए सफाइ