नक्कली भुटानी शरणार्थी प्रकरणमा पूर्व गृहमन्त्री बालकृष्ण खाँण ३० लाख धरौटीमा रिहा हुने भएका छन् ।

उच्च अदालत पाटनका न्यायाधीश कृष्णराम कोइरालाको इजलासले ३० लाख धरौटीमा रिहा गर्न आदेश गरेपछि खाँण कारागारमुक्त हुने भएका हुन् ।

अघिल्लोपटक सुनुवाइ हुँदा खाँणका सम्बन्धमा न्यायाधीशहरूको राय बाझिएको थियो ।

न्यायाधीश जनक पाण्डेले खाँणलाई ३० लाख धरौटीमा छाड्नुपर्छ र प्रकाश खरेलले थुनामै राख्नुपर्छ भन्ने राय दिएका थिए ।

बिहीवार न्यायाधीश कोइरालाको राय न्यायाधीश पाण्डेसँग मिलेपछि खाँण धरौटीमा छुट्ने पक्का भएको हो ।

हेर्नुहोस्, आदेश:

उच्च अदालत नियमावली २०७३ को नियम १२ मा राय बाझिएको अवस्थामा तेस्रो न्यायाधीशको निर्णय अन्तिम मानिने व्यवस्था छ ।

नियम १२ को उपनियम (१) मा भनिएको छ-

संयुक्त इजलासबाट हेरिने मुद्दा तथा प्रतिवेदनको सुनुवाइ गर्दा दुईजना न्यायाधीशहरूका बीच मतैक्य नभएमा दुई न्यायाधीशहरूको रायसहित सो मुद्दा वा प्रतिवेदन निर्णयार्थ तेस्रो न्यायाधीशसमक्ष पेस गरिनेछ । यसरी पेस भएपछि तेस्रो न्यायाधीशको रायबमोजिम कायम हुन आएको बहुमतको निर्णय अन्तिम निर्णय मानिने छ ।