२४ जेठ २०८३, आइतबार
राष्ट्रिय सभा निर्वाचनमा एक भएर जानका लागि १९ सिटमा भागबण्डा मिलाउन बसेको सत्ता गठबन्धनको बैठक निष्कर्षविहीन बनेको छ । प्रधानमन्त्री निवास बालुवाटारमा शनिबार साँझ बसेको सत्ता गठबन्धनको बैठकमा सिट बाँडफाँटको विषयमा समान्य छलफल हुनुबाहेक ठोस सहमति जुट्न नसकेको बताइएको छ ।
गठबन्धन दलबीच १९ सिटको भागबण्डा मिलाउन निरन्तर छलफल हुँदै आएपनि ठोस सहमति जुट्न सकेको छैन । बैठकपछि राष्ट्रिय जनमोर्चाकी नेत्री दुर्गा पौडेलले भागबण्डाको विषयमा अझै सहमति जुटिनसकेको बताइन् ।
उनका अनुसार बैठकमा प्रधानमन्त्री प्रचण्डले सबैलाई मिलाएर जान आफू तयार रहेको बताएका थिए । बैठकमा समग्र विषयमा छलफल भएपनि ठोस सहमति नभइसकेको उनको भनाइ छ ।
स्रोतका अनुसार गठबन्धनमा कांग्रेसले १० भन्दा बढी सिटमा दाबी गरेको छ भने माओवादीले पनि ७ सिटमा दाबी गरेको छ । यस्तै साना दलले पनि सोहीअनुसार दाबी गर्दा भागबण्डा मिलाउन सकस भइरहेको छ ।
गठबन्धनले नेकपा एमालेलाई समेत टीआरसीमा सहमत भएको खण्डमा सिट दिन सकिने बताएको भएपनि अन्ततः त्यो च्याप्टर बन्द भएको छ । एमालेले टीआरसीमा सहमत हुन नसक्ने जवाफ दिएपछि गठबन्धन दलबीचमात्रै भागबण्डा मिलाएर जानेबारे छलफल अघि बढेको हो । गठबन्धन एक भएर गएको खण्डमा एमालेले राष्ट्रियसभाका सबै सिट गुमाउने अवस्था छ ।
नेताहरुका अनुसार आइतबार पनि छलफल गरेर सहमति जुटाउने तय भएको छ । यद्यपि बैठक आइतबार कतिबेला बस्ने भन्नेबारे भने टुंगो लागिसकेको छैन ।
