२८ जेठ २०८३, बिहीबार
नारायणगढ-मुग्लिन सडकखण्डअन्तर्गत चितवनको इच्छाकामना गाउँपालिकामा त्रिशुली नदीमा बत्ती बलेको देखिएपछि गोताखोरको टोली परिचालन गरिएको छ । मंगलबार बिहानै गोताखोरको टोली डुंगा लिएर त्रिशूली नदीमा प्रवेश गरेको मुग्लिन प्रहरीले जनाएको छ ।
राति नदीमा बत्ती बलेको देखेपछि एक जना स्थानीयले प्रहरीलाई खबर गरेका थिए ।
प्रहरीका अनुसार नदीमा गाडी खसेको हुनसक्ने अनुमान छ । यद्यपि कुनै जानकारी भने मिलेको छैन । 'राति नदीमा पानीभित्र बत्ती बलेको देखिएको थियो,' मुग्लिन प्रहरीका एक अधिकारीले लोकान्तरसँग भने, 'पानीभित्र बत्ती बलेको देखिएकोले गाडी खसेको हो कि भन्ने आशंका हो । यद्यपि कुनै जानकारी मिलेको छैन । गोताखोरको टोलीले डुंगा लिएर खोजतलास गरिरहेको छ ।'
नदी किनारमा एउटा फलामको टुक्रा र भारतीय नम्बर प्लेट भेटिएको उनले बताए । तर, त्यो अहिलेको हो वा पुरानो हो भन्ने पनि यकिन नभएको उनको भनाइ छ ।
