२२ जेठ २०८३, शुक्रबार
काठमाडौं, १८ असोज — अमेरिकाको लास भेगासमा आइतवार राति अन्धाधुन्ध गोली चलाएर ५९ जनाको हत्या गर्ने स्टिफन प्याडकले केही दिनपहिले एक लाख डलर फिलिपिन्स पठाएको खबर आएको छ ।
यस घटनाको अनुसन्धान गरिरहेका प्रहरी अधिकारीहरूले यसरी रकम पठाएको पत्ता लगाएका हुन् । तर प्याडकले किन नरसंहार गरे भन्ने विषयमा प्रहरीको अनुसन्धान जारी छ ।
अधिकारीहरू प्याडकको आर्थिक कारोबारका विषयमा अनुसन्धान गरिरहेका छन् । प्याडकलाई जुवाको कुलत लागेको चाहिँ उनीहरूले पत्ता लगाएका छन् ।
अनुसन्धानमा प्याडकका सम्बन्धमा विगत तीन वर्षयता २०० वटा शंकास्पद गतिविधिको रिपोर्ट आएको खुलेको छ । क्यासिनोमा उनले गरेको कारोबारलाई सन्देहको घेरामा राखिएको हो ।
एनबीसी न्युज रिपोर्टअनुसार, फिलिपिन्सस्थित एक बैंकको खातामा अघिल्लो हप्ता एक लाख डलर जम्मा गरिएको थियो ।
अधिकारीहरूका अनुसार, ६२ वर्षीया मारिलू डानली प्रायः जसो प्याडकसँगै बस्थिन् तर आइतवार घटना भएको दिन उनी फिलिपिन्समा थिइन् । तर प्याडकले प्रेमिकालाई नै यति ठूलो रकम पठाएको हो कि उसको अर्को कुनै उद्देश्य थियो भन्ने थाहा हुन सकेको छैन ।
लास भेगासका प्रमुख प्रहरी अधिकारी जोसेफ लोम्बार्डोले डानली यस घटनाको महत्त्वपूर्ण कडी भएको बताएका छन् । एफबीआईले उनलाई फिलिपिन्सबाट अमेरिका झिकाएर सोधपुछ गर्ने अनि त्यसबाट प्याडकको उद्देश्यका बारेमा थाहा पाइने लोम्बार्डोले बताए ।
एजेन्सी
