०५ साउन २०८३, मंगलबार
नेकपा (माओवादी केन्द्र)का अध्यक्ष पुष्पकमल दाहाल प्रचण्डले आफ्नो पार्टी व्यवस्थित भएर आउन लागेकोमा बैरीहरू छटपटिएको टिप्पणी गरेका छन् । विधान सम्मेलनपछि पार्टी अझ सशक्त बन्ने उनले बताए ।
मंगलवारदेखि काठमाडौंमा जारी विधान अधिवेशनलाई विहीवार सम्वोधन गर्दै प्रधानमन्त्रीसमेत रहेका अध्यक्ष प्रचण्डले माओवादी व्यवस्थित हुनलाग्दा बैरीहरू तरंगित भएको बताएका हुन् ।
‘माओवादी व्यवस्थित भएर आउँदैछन् भनेर बैरीहरुमा तरंग पैदा हुन्छ भन्ने नै मलाई लाग्छ । हामी पार्टी बनाउने प्रक्रियामा जहाँ आएका छौं, अब सशक्त ढंगले अगाडी बढ्छ,’ उनले भने । उनले कसलाई बैरी भनेका हुन, त्यो खुलाएनन् ।
प्रचण्डले विधान सम्मेलनमा व्यवस्थित ढंगले छलफल भएको पनि बताए । ‘छलफल र बहस खुलेर भयो, विभिन्न कोणबाट विचार प्रस्तुत पनि भयो व्यवस्थित, अनुशासित र संयमित ढंगले प्रस्तुत भयो, म खुसी भएको छु,’ उनले भने ।
१५१ सदस्यीय केन्द्रीय समिति महाधिवेशनबाट प्रत्यक्ष निर्वाचित हुने र तिनले अध्यक्षलगायत पदाधिकारी चयन गर्ने व्यवस्थसहितको विधान पारित गर्दै अधिवेशन बिहीवार समापन हुँदैछ ।
