बुटवल नजिकैको जंगलमा नेपाल प्रहरीका एक जना हवल्दार मृत फेला परेका छन् ।

प्रहरी चौकी भातागाडा, डडेलधुरामा कार्यरत प्रहरी हवल्दार भूपेन्द्र ठकुल्लाको ​शव बुटवलको जंगलमा फेला परेको रुपन्देही प्रहरी प्रमुख भरत विकले जानकारी दिए । 

‘हाम्रो अनुसन्धानमा उनी काठमाडौंबाट नेपालगन्ज फर्किंदै गर्दा एक्लै जंगलमा झरेको देखिन्छ’, एसपी विकले भने, ‘हामीले पुस २९ गते बुटवल उपमहानगरपालिका–७ स्थित शिवनगर सामुदायिक वनमा उनको शव भेटेका हौं । हामीले भेट्दा शव सडिकसको अवस्था थियो ।’

ठकुल्लाको मानसिक अवस्था ठीक नभएको पाइएको एसपी विकले बताए । 

‘उनको मानसिक अवस्था ठीक रहेनछ । एक्लै यात्रा गर्ने क्रममा गाडीबाट झरेछन्। जंगलमा खान नपाएर उनको मृत्यु भएको पनि हुनसक्छ। पोस्टमार्टम रिपोर्ट आउन बाँकी छ', एसपी विकले भने । ठकुल्लाको शव पोस्टमार्टमपछि आफन्तले बुझिलगेका उनले जानकारी दिए ।