१० असार २०८३, बुधबार
प्रधानसेनापति प्रभुराम शर्माले रथीमा पदोन्नति भएका उपरथी निर्मलकुमार थापालाई दर्ज्यानी चिन्ह प्रदान गरेका छन् ।
मंगलवार प्रधानसेनापतिबाट दर्ज्यानी चिन्ह प्राप्त गरेका थापा श्री बलाध्यक्ष विभागमा नियुक्त भएका छन् ।
विक्रम सम्वत् २०२४ असोज २५ गते ललितपुरमा जन्मिएका रथी थापा, २०४३ फागुन ३ गते नेपाली सेनाको अधिकृत क्याडेट दर्जामा प्रवेश गरेका थिए । यस्तै उनी २०४५ जेठ १९ गते नेपाली सैनिक प्रतिष्ठानबाट सहायक सेनानी बनेका हुन् ।
थापाले अनाश्रित गुल्मपति, पदिक गणको गणपति, बाहिनीपति र पृतनापतिका साथै, पीएसओज् सचिव, सैनिक सचिव, युद्धकार्य विभागको विभागीय प्रमुख, सैनिक इन्टेलिजेन्स महानिर्देशक एवं राष्ट्रिय सुरक्षा परिषद्को सह-संयोजकको जिम्मेवारी सम्हालेका छन् ।
अमेरिका, मलेसिया र रसियामा सञ्चालन भएका विभिन्न तालिम तथा सेमिनारहरूमा सहभागी भएका रथी थापाले बङ्गलादेशबाट एनडीसी तालिम सम्पन्न गरेका छन् ।
यस्तै, युगोस्लाभिया, इथियोपिया र इरिट्रिया, लेबनान तथा कंगोमा शान्ति सेनामा सहभागी भएका छन् ।
उनलाई नेपाल सरकारले गत माघ २५ गते रथीमा बढुवा गर्ने निर्णय गरेको थियो ।
