१६ असार २०८३, मंगलबार
श्रम, रोजगार तथा सामाजिक सुरक्षामन्त्री शरत्सिंह भण्डारीले सामाजिक न्यायका लागि विश्वव्यापी साझेदारीमा नेपालले यथाशीध्र सहभागिता जनाउने बताएका छन् ।
अन्तर्राष्ट्रिय सामाजिक न्याय दिवस, २०२४ को सन्दर्भ पारेर आज श्रम मन्त्रालयमा आयोजित कार्यक्रममा मन्त्री भण्डारीले सरोकारवाला निकायसँग थप परामर्श गरी आवश्यक प्रक्रिया पूरा गरेर यथाशीघ्र उक्त अभियानमा सहभागी हुन बताए ।
मन्त्रालयका सचिव केवलप्रसाद भण्डारीले सामाजिक न्यायको क्षेत्रमा नेपालले हालसम्म गरेका प्रयास, साझेदार निकायसँगको सहकार्य एवं नेपालमा सामाजिक न्याय स्थापनाका लागि विश्वव्यापी साझेदारीका महत्वका विषयमा जानकारी गराएका थिए ।
अन्तर्राष्ट्रिय श्रम सङ्गठनका महानिर्देशक र नेपाल कार्यालयका निर्देशक नुमान ओज्कानले नेपाललाई सामाजिक न्यायका लागि विश्वव्यापी साझेदारीमा सहभागी हुन आमन्त्रण गरे । संयुक्त ट्रेड युनियन समन्वय केन्द्र (जेटियुसिसी) का अध्यक्ष योगेन्द्र कुँवर तथा नेपाल उद्योग वाणिज्य महासङ्घका अध्यक्ष चन्द्रप्रसाद ढकालले उक्त साझेदारीमा नेपालको सहभागिता महत्वपूर्ण रहेको बताए । रासस
