०८ साउन २०८३, शुक्रबार
मनिला–मध्य फिलिपिन्सको सेबु शहरमा एक दर्जनभन्दा बढी घरहरू जल्नेगरी भएको आगलागीमा एकै परिवारका चार जनाको मृत्यु भएको स्थानीय अग्निनियन्त्रकले बुधवार बताएका छन् ।
स्थानीय समयअनुसार मंगलवार राति २ः०० बजतिर आगलागी हुँदा उनीहरू गहिरो निन्द्रामा रहेको नगरीय दमकल कार्यालयका वेन्डेल भिलानुएभाले बताएका छन् ।
आगलागीबाट बाँचेकी एक छोरीले सुरक्षाकर्मीसँगको कुराकानीमा आगलागीमा आमाबाबु र दुई भाइहरूको मृत्यु भएको बताइन् ।
उनले भनिन्, ‘बुवा, आमा र दुई भाइ घरको तेस्रो तलामा सुतिरहेको तथा अन्य सदस्य तल्लो तलामा सुतिरहेको अवस्थामा आगलागी भएको र माथिल्लो तलामा रहेका चार जनाको मृत्यु भएको छ ।’
आगलागीमा परी परिवारका अन्य आठ जना सदस्य घाइते भएका छन् ।
आवासीय क्षेत्रमा द्रूत गतिमा फैलिएको आगो निभाउन अग्नि नियन्त्रकलाई तीन घण्टा लागेको थियो भने आगलागीका कारण नजिकका ३० परिवार प्रभावित भएको जनाइएको छ ।
