काठमाडौं, २३ असोज — उत्तर कोरियाले यसै वर्षको मे महिनामा किम जोङ–उनको हत्याको षड्यन्त्र अमेरिकाले रचेको र उक्त देश नै ‘आतंकवादको प्रमुख दोषी’ रहेको आरोप लगाएको छ ।

उत्तरले प्रायः अतिरञ्जित बयानहरू दिइरहेको हुन्छ । यसैक्रममा उसले दिएको ताजा बयानमा अमेरिकी हस्तक्षेपका कारण ‘अन्तर्राष्ट्रिय आतंकवाद अहिलेसम्म निर्मूल हुन नसकेको’ बताएको छ ।

गत शुक्रवार कोरियन सेन्ट्रल न्युज एजेन्सीले प्रकाशित गरेको बयानअनुसार, किमलाई अपदस्थ गर्ने अमेरिकी प्रयासलाई आफूहरूले असफल बनाएको उल्लेख छ ।

आतंकवादविरुद्धको युद्धको बहाना बनाएर वाशिङटनले आफूलाई मन नपरेका सरकारहरू गिराउने प्रयास गरेको उत्तर कोरियाले आरोप लगायो ।

‘यसै वर्षको मे महिनामा खतरनाक आतंकवादीहरूको एक दस्ता सीआईएको निर्देशनमा हाम्रो देशभित्र घुस्यो र हाम्रो सर्वोच्च नेताको कार्यालयमा पसेर जैविक तथा रासायनिक आक्रमण गर्नै लाग्दा हामीहरूले उनीहरूलाई पक्रियौं,’ केसीएनएले लेख्यो ।

अमेरिका र दक्षिण कोरियाले ‘प्लान जुपिटर’ नामक षड्यन्त्र बुनेर किमलाई अपदस्थ गर्न खोजेको आरोप उत्तर कोरियाले लगाउँदै आएको छ ।

तर यो दाबीलाई हालसम्म स्वतन्त्र रूपमा पुष्टि गरिएको छैन ।

एजेन्सी