०६ साउन २०८३, बुधबार
प्रधानमन्त्री पुष्पकमल दाहाल प्रचण्ड नेतृत्वको सरकारलाई विश्वासको मत दिन नागरिक उन्मुक्ति पार्टी (नाउपा)ले ह्विप जारी गरेको छ ।
नाउपाकी अध्यक्ष तथा संसदीय दलकी नेता रञ्जिता श्रेष्ठले मंगलवार साँझ ह्विप जारी गरेकी हुन् ।
प्रधानमन्त्री प्रचण्ड बुधवार प्रतिनिधिसभामा विश्वासको मत लिने प्रयोजनका लागि संसद् सचिवालयमा जानकारी गराएसँगै नाउपाले ह्विप जारी गरेको हो ।
‘बुधवारको प्रतिनिधिसभाको बैठकमा नागरिक उन्मुक्ति पार्टी संसदीय दलको बैठकको निर्णयबमोजिम अनिवार्य उपस्थित हुन र प्रधानमन्त्री पुष्पकमल दाहाल ‘प्रचण्ड’ले आफूमाथि प्रतिनिधिसभाको विश्वास छ भन्ने प्रस्तावको पक्षमा मतदान गर्न (निर्देशन) ह्विप जारी गरिएको ब्यहोरा अनुरोध छ,’ विज्ञप्तिमा भनिएको छ ।
यसअघि नाउपाको रेशम चौधरी पक्षले भने संघीय सरकारमा सहभागी नहुने निर्णय गरेको थियो ।
मंगलवार बसेको संस्थापक केन्द्रीय सदस्यहरूको दुई–तिहाइ बहुमतको निर्णयले केन्द्र सरकारमा तत्काल सहभागी नहुने निर्णय गरेको सो समूहको भनाइ थियो ।
अहिले नाउपामा अध्यक्ष रञ्जिता श्रेष्ठ र पूर्वअध्यक्ष रेशमबीच विवाद छ । रेशम पक्षधरहरू सुदूरपश्चिम सरकारमा सहभागी भएका छन् । तर केन्द्रमा भने उनीहरूले पुष्पकमल दाहाल प्रचण्ड नेतृत्वको गठबन्धन सरकारलाई समर्थन नगर्ने भएका हुन् ।
रञ्जिता पक्ष भने वर्तमान गठबन्धनतिर लचक र नेपाली कांग्रेससँग टाढा देखिएको छ ।
नाउपाका ४ जना संघीय सांसद छन् । ती कुन पक्षमा लाग्नेछन् त्यो भने बुधवार थाहा हुनेछ ।
