अख्तियार दुरुपयोग अनुसन्धान आयोगले सल्यानको शारदा नगरपालिका वडा नम्बर ३ का तत्कालीन वडा अध्यक्ष टोपबहादुर थापाविरुद्ध भ्रष्टाचार मुद्दा दायर गरेको छ ।

मृत्यु भइसकेको मानिसको नाममा वृद्धभत्ता वितरण गरेको भन्दै उनीविरुद्ध ५१ हजार रुपैयाँ बिगो कायम गरी बुधवार विशेष अदालतमा मुद्दा दायर गरिएको आयोगले जनाएको छ ।

आयोगका प्रवक्ता नरहरि घिमिरेका अनुसार तत्कालीन वडा अध्यक्ष थापाले अस्तित्वमा नभएको व्यक्तिको नामको आर्थिक वर्ष  २०७४/७५, आव २०७५/७६ को प्रथम, दोस्रो र तेस्रो किस्ताका साथै आर्थिक वर्ष २०७६/७७ को प्रथम किस्ताको पहिलो महिनासम्मको गरी ५१ हजार रुपैयाँ सामाजिक सुरक्षा भत्ता बुझेका थिए ।