नेपाली कांग्रेसका सांसद प्रदीप पौडेलले प्रश्नप्रश्नै बोकेर गृहमन्त्री रवि लामिछाने पदमा बस्न नमिल्ने बताएका छन् ।

प्रतिनिधि सभाको बैठकमा शुरूमै बोल्दै पौडेलले प्रश्न, अनुसन्धान र विवादको घेरामा उभिएका नेतालाई गृहमन्त्री बनाउनु नै गलत भएको भन्दै उनले तत्काल राजीनामा दिन माग गरेका हुन् ।

‘केही दिनदेखि प्रतिपक्षी संसद्‌मा प्रश्न उठाउँदै आएको छ । प्रधानमन्त्री सामनाको साटो भागेर हिँड्नुभएको छ । गृहमन्त्रीले विगतमा प्रश्न गर्ने पेशा अंगाल्नुभएको थियो । राजनीतिमा प्रश्न गर्न पाउनुपर्छ । आफ्नाविरुद्ध प्रश्न उठाउन पाइँदैन भन्ने हुँदैन । प्रश्नलाई निषेध गर्न पाइँदैन भन्न पनि मिल्दैन’, पौडेलले भने, ‘प्रश्न बोकेर उहाँ गृहमन्त्री बन्न हुन्थेन । प्रधानमन्त्रीले प्रश्न हुने मानिसलाई गृहमन्त्री  बनाउन पनि हुने थिएन । ३१ हजार सहकारीमा ७३ लाख बचत कर्ता छ । बचत फिर्ताको माग उनीहरूको छ । अनुसन्धानको घेरामा रहेको व्यक्ति सरकारको प्रमुख पदमा हुँदा सहकारी पीडितको माग कसरी पूरा हुन्छ ? पीडितको समस्या समाधान गर्न नसक्ने सरकारले वित्तीय समस्यालाई कसरी समाधान गर्न सक्छ ।’

यसैले गृहमन्त्रीले तत्काल राजीनामा दिनुपर्ने उनले बताए ।

‘पीडितहरूले आन्दोलनबाट गर्ने अस्तव्यस्ततालाई सरकारले कसरी थेग्न सक्छ ? मेरा मित्र माननीय गृहमन्त्रीलाई आग्रह गर्न चाहन्छु । उच्च नैतिकताको आधारमा राजीनामा दिएर उदाहरण प्रस्तुत गर्नस्’, पौडेलले भने, ‘प्रधानमन्त्रीले पटकपटक सुशासन भन्नुहुन्छ । विगतको गठबन्धन तोड्दा पनि कांग्रेसको कारण सुशासन लागू गर्न नसकेको आरोप लगाउनुभयो । जोमाथि अनुसन्धान चलिरहेको छ उसैलाई अनुसन्धानको तालाचाबी दिएर सुशासन हुन सक्छ ?’

एमालेले पनि नेतालाई जोगाउन नियत राखेको उनले बताए ।

‘तत्कालीन प्रतिपक्षी एमालेलाई आग्रह गर्छु । जाँचबुझ आयोग बनाउनुपर्छ भनेर एमालेले भनेको थियो । म सत्तारुढ दलको हुँदा पनि त्यही कुरा उठाइरहेको थिएँ । आज प्रहरीले राजनीतिक मान्छेलाई जाँचबुचको दायरामा ल्याउन सक्ने रहेनछ नि । गृहमन्त्री स्वयंमले प्रमाण नष्ट भएको कुरा स्वीकार्नुभएको छ । तपाईं मातहतको गृह मन्त्रालयमा प्रमाण नष्ट नहुँदा कुन नैतिकताले कुर्सीमा बस्नुभएको छ?’, उनले भने, ‘प्रश्न प्रश्न उठ्दा कसरी सुशासन हुन्छ ? प्रधानमन्त्रीबाट इमान्दार प्रतिवद्धता व्यक्त हुनुपर्छ । समग्र प्रकरणलाई नयाँ सिराबाट छानबिन नभएसम्म कांग्रेसले यो प्रश्न उठाइरहन्छ । यसलाई गम्भीरतापूर्वक लिइयोस् ।’