रुसी सेनामा कार्यरत रहँदा ज्यान गुमाएका नेपालीहरूका परिवारले मृत्यु भएका आफ्ना परिवारका सदस्यको शवको पुष्टिका लागि डीएनएको नमूना दिएका छन् ।

उनीहरूले बिहीवार महारागञ्जस्थित त्रिवि शिक्षण अस्पताल गएर नमूना दिएका हुन् ।

परराष्ट्र मन्त्रालयका अनुसार गत २४ फागुनमा रुसले आफ्नो देशको सेनामा कार्यरत रहँदा मृत्यु भएका १५ जना नेपालीको शव पहिचानका लागि नेपालबाट परिवारका सदस्यको डीएनएको नमूना पठाइदिन पत्राचार गरेको  थियो ।

मन्त्रालयअन्तर्गतको कन्सुलर सेवा विभागका अनुसार दाङका जीतबहादुर पुन मगर र अभिषेक बुढा, नवलपरासीका प्रेमप्रकाश न्यौपाने, बाँकेका चन्द्रबहादुर बीसी, मकवानपुरका विजयबहादुर थोकर र जीतेन्द्रबहादुर घिसिङ, प्युठानका सोमेश सुनुवार र विकास राईको डीएनए नमूना पठाइदिन भनिएको छ ।

यस्तै मोरङका घनश्याम शाही, अछामका प्रेमबहादुर कठायत, ओखलढुंगाका खोमबहादुर भुजेल, धनुषाका विमलकुमार गजमेर, तेह्रथुमका टीकाबहादुर रानामगर र भीमबहादुर बीसी, खोटाङका क्षितिज बस्नेतको परिवारको पनि डीएनए नमूना पठाइदिन भनिएको छ ।

कन्सुलर सेवा विभागका महानिर्देशक प्रकाशमणि पौडेलका अनुसार हालसम्म १५ जनामध्ये ८ जनाको नमूना रुस पठाइएको छ ।