नयाँ सत्ता समीकरण बनेसँगै बागमती प्रदेशमा मन्त्रिपरिषद् पुनर्गठन भएको छ । मुख्यमन्त्री शालिकराम जम्कट्टेलको सिफारिसमा प्रदेश प्रमुख यादवचन्द्र शर्माले संविधानको धारा १६८ को उपधारा ९ बमोजिम मन्त्रिपरिषद् विस्तार तथा पुनर्गठन गरेका हुन् । 

नयाँ समीकरणअनुसार एमाले, माओवादी केन्द्र र एकीकृत समाजवादीसँगै सत्ता गठबन्धनमा हाम्रो नेपाली पार्टीको प्रवेश भएको छ । हाम्रो नेपाली पार्टीको साथ रहेमा बागमतीमा सत्ता गठबन्धन जोखिने अङ्कगणित थियो भने सोहीअनुसार सो पार्टीले साथ दिएपछि जम्कट्टेल नेतृत्वको सरकार जोगिने भएको छ । 

मन्त्रिपरिषद् पुनर्गठनअनुसार हाम्रो नेपाली पार्टीका शैलेन्द्र मान बज्राचार्य संस्कृति, पर्यटन तथा सहरी विकासमन्त्री बनेका छन् । यस्तै लक्ष्मण लम्साल श्रम, राजेन्द्र मान श्रेष्ठ कृषि तथा पशुपक्षी, युवराज दुलाल भौतिक पूर्वाधार, गङ्गानारायण श्रेष्ठ आन्तरिक मामिला र कुमारी मोक्तान सामाजिक विकास मन्त्री रहेका छन् । 

अन्य बाँकी ५ मन्त्रालय भने हाललाई मुख्यमन्त्री आफैले राखेका छन् । ती मन्त्रालय एमालेलगायतलाई समेटेर मन्त्रिपरिषद् विस्तार गरिने छ ।