नेपाली कांग्रेसका महामन्त्री गगन थापाले पार्टी फेरि सरकारमा पुग्ने बताएका छन् । सरकारले नै कांग्रेसलाई पच्छाउने उनले दाबी गरे । 

संवाद यात्राको क्रममा शुक्रवार कपिलबस्तुको लबनीमा कार्यकर्तालाई सम्बोधन गर्दै महामन्त्री थापाले सरकारमा भए पनि नभए पनि देशलाई निकास र भरोसा दिने काम कांग्रेसको भएको बताएका हुन् । 

‘कांग्रेसको कार्यक्रममा जहाँ गइरहेको छु बाहिरभन्दा निरासा पार्टीभित्र छ । अहिले सरकारमा छैनौं, भर्खर गएको हो एक/डेढ हप्ता त भयो । फेरि आइहाल्छौ, धेरै पनि छैन । केही समयमा आइहाल्छौं । सरकारले कांग्रेसलाई पच्छाइहाल्छ’ थापाले भने । 

उनले देशमा भइरहेको निराशालाई कांग्रेसले मात्र निकास दिन सक्ने बताए । ‘एमालेसँग आन्दोलन गर्ने क्षमता छ, नयाँ पार्टीसँग हल्ला गर्ने क्षमता छ । देशलाई निकास दिन सक्ने चरित्र भएको पार्टी कांग्रेस मात्र हो,’ थापाले भने । 

महामन्त्री थापाले बिहीवार पनि कार्यकर्तालाई केन्द्र सरकारको बारेमा धेरै चिन्ता नलिन आग्रह गर्दै केही समयमा फेरि सरकार चलाउने बताएका थिए ।