१० साउन २०८३, आइतबार
गण्डकी प्रदेशको मुख्यमन्त्री नियुक्तिका लागि गरिएको दाबीमा बहुमत पुर्याउन आफ्नोसमेत गणना भएको बारे प्रदेश सभाका सभामुख कृष्णप्रसाद धितालले हस्ताक्षर नगरेको बताएका छन् ।
धितालको समेत नाम जोडेर गरिएको दाबीका आधारमा प्रदेश प्रमुखले एमाले नेता खगराज अधिकारीलाई मुख्यमन्त्री नियुक्त गरिसकेका छन् ।
‘सभामुख निर्वाचित भएपछि मैले दलको सदस्यबाट राजीनामा गरिसकेको हुँ, कसैलाई मुख्यमन्त्री बनाउन मैले हस्ताक्षर गरेको छैन । गर्न मिल्ने कुरा पनि भएन’, धितालले लोकान्तरसँग भने ।
माओवादीका अर्का एक सांसदले संसदीय दलको नेताको हस्ताक्षर गरेर लेटरप्याडमा संख्या मात्र जनाइएको हो । बहुमत पुर्याउन गरिएको दावीमा सभामुख धितालको संख्या जोडिएको छ । ६० सदस्य रहेको प्रदेश सभामा बहुमतका लागि ३१ सांसदको आवश्यक पर्छ ।
नेकपा एमालेका २२, माओवादीका ८ (सभामुख समेत) र स्वतन्त्र दीपक मनाङेलाई जोडेर ३१ जनाको दावी गरिएको थियो । सभामुखलाई गणना गरेर मुख्यमन्त्री नियुक्ति नगर्न कांग्रेसले प्रदेश प्रमुख डिल्लीराज भट्टलाई ध्यानाकर्षण गराएको थियो ।
फागुन २१ को राजनीतिक समीकरणपछि प्रदेश प्रमुख नियुक्त भएका भट्टले एमाले–माओवादीले बहुमतको दाबी गर्नासाथ मुख्यमन्त्री नियुक्त गरेका हुन् । सभामुखको समेत नाम जोडेर मुख्यमन्त्री नियुक्त गरिएको भन्दै नेपाली कांग्रेसले संवैधानिक उपचार खोज्ने चेतावनी दिएको छ ।
यसअघि कोशी प्रदेशमा उद्धव थापालाई मुख्यमन्त्री बनाउने बेला सभामुख बाबुराम गौतमले दिएको मतलाई सर्वोच्चले अवैध भनेको थियो ।
