२३ जेठ २०८३, शनिबार
बैतडीमा लामो समयको खडेरीपछि वर्षा हुँदा किसानलाई राहत मिलेको छ । वर्षा भएपछि उनीहरूलाई खेतीपाती गर्न सहज भएको छ ।
वर्षा भएपछि मकै छर्न तथा अन्य बालीनाली लगाउन सहज भएको दोगडाकेदार गाउँपालिका–३ का किसान फुनडी विष्टले बताए ।
उनले भने, 'लामो समयको खडेरीपछि पानी परेको छ, अब यसले बालीनालीलाई फाइदा पुग्ने भयो ।'
वर्षाले तरकारी बाली र फलफूल खेतीमा सिँचाइको काम गरेको दार्चुलाको लेकमका किसान मानबहादुर कार्कीले बताए । मकै छर्न तयार भएका किसान वर्षापछि खुसी भएका छन् ।
सिँचाइ अभावमा तरकारी बाली र फलफूल सुक्न थालेका थिए । बैतडीमा मकैखेती १४ हजार पाँच सय हेक्टर जग्गामा गरिँदै आएको छ ।
यसैबीच वर्षापछि यहाँका वन जङ्गलमा लागेको डढेलो पनि नियन्त्रणमा आएको छ ।
डढेलोका कारण वायु प्रदूषण बढेको थियो । वर्षापछि प्रदूषण कम भएको छ । बैतडीका एक सयभन्दा बढी वनमा डढेलो लागेको थियो ।
