२६ जेठ २०८३, मंगलबार
प्रतिपक्षी दल नेपाली कांग्रेसले उपप्रधान तथा गृहमन्त्री रवि लामिछानेमाथि संसदीय समिति गठनको मागमा अडिग रहने निर्णय गरेको छ । शुक्रबार बिहान बसेको कांग्रेस संसदीय दल बैठकले लामिछानेमाथि संसदीय समिति गठनको मागमा अडिग रहने निर्णय गरेको कांग्रेस सचेतक रमेश लेखकले जानकरी दिए ।
सरकार नै सहकारी ठगीमा लागेकालाई बचाउन लागिपरेको ठहर कांग्रेसले गरेको उनले बताए । कांग्रेसले सहकारी ठगीमा संलग्नलाई बचाउने काममा नलाग्न सरकारलाई चेतावनी दिएको छ । 'सहकारी ठगीलाई बचाउन सरकार लागेको छ । सरकारलाई चेतावनी दिएका छौँ– यस्तो ठगी बचाउने काम सरकारले नगरोस्,' बैठकपछि उनले भने ।
उनका अनुसार कांग्रेसले संसद् बैठकमा सभामुखको भूमिका तटस्थ र निष्पक्ष नरहेको ठहरसमेत गरेको छ । 'संसदीय मूल्य र मान्यतामा विपक्षी दल उभियो भने पनि संसद् अवरोध मानिन्छ । विपक्षीसहित सबै विपक्षमा रहेका दलका सांसदहरू उभिएका बेला संसद् सञ्चालन उचित थिएन । सभामुखको पद तटस्थता र निष्पक्षताको पद हो,' उनले भने, 'सभामुख निर्वाचित भएपछि संलग्नता स्थगित गर्नुपर्छ । सभामुखलाई तटस्थता र निष्पक्षतासहित बैठक सञ्चालन गर्न आह्वान गरेका छौँ ।'
रविमाथि संसदीय छानबिनको माग गर्दै कांग्रेसले निरन्तर संसद् अवरुद्ध गर्दै आएको छ । बिहीबारको बैठकमा कांग्रेसको अवरोधबीच सभामुखले संसद्को काम कारबाही अगाडि बढाएपछि तनाव उत्पन्न भएको थियो । कांग्रेस र एमालेका सांसदबीच धकेलाधकेल भएको थियो । संसद्को बैठक आज पनि बस्दै छ ।
