एकैदिनमा छलफल सकेर नीति कार्यक्रम पारित गर्ने सरकारको तयारी, ११ गतेलाई तोकियो दिन

सहकारी ठगी प्रकरणमा गृहमन्त्री रवि लामिछानेमाथि संसदीय छानबिन समिति प्रमुख प्रतिपक्षी दल नेपाली कांग्रेसले संसद् अवरुद्ध गरेपछि सरकारको नीति तथा कार्यक्रममाथिको छलफल एकै दिनमा टुङ्ग्याइने भएको छ । त्यसका लागि जेठ ११ गतेको समय तोकिएको छ ।

मंगलबार बसेको प्रतिनिधि सभा बैठकमा सभामुख देवराज घिमिरेले जेठ ११ गते एकैदिन छलफल र प्रधानमन्त्रीले जवाफ दिने गरी दिन तोकिएको जानकारी दिएका हुन् ।

मंगलबार नै प्रधानमन्त्री पुष्पकमल दाहाल 'प्रचण्ड'ले नीति तथा कार्यक्रमको प्रति संसद्‌मा टेबल गरेका थिए ।

नेपाली कांग्रेसको नाराबाजी र अवरोधबीच प्रधानमन्त्री प्रचण्ड संसद्को रोष्ट्रममा पुगेर सरकारको नीति तथा कार्यक्रम टेबल गरेका थिए ।

कांग्रेसले अवरोध गर्ने भएपछि एकैदिनमा छलफल गरेर नीति तथा कार्यक्रम पारित गर्ने तयारी रहेको सरकारका एक मन्त्रीले जानकारी दिए ।

सहकारी ठगी सम्बन्धमा गृहमन्त्री लामिछानेमाथि संसदीय छानबिन नहुँदासम्म बैठक चल्न नदिने कांग्रेसले बताउँदै आएको छ ।

सामान्यतया सरकारका नीति तथा कार्यक्रममाथिको छलफल तीन दिनदेखि ५ दिनसम्म चल्ने गरेको थियो ।

राष्ट्रपति रामचन्द्र पौडेलले जेठ १ गते संसद्‌मा सरकारका नीति तथा कार्यक्रम पेश गरेका थिए ।

जेठ १५ गते बजेट ल्याउनुपर्ने संवैधानिक बाध्यता छ ।

त्यसअघि संसद्‌बाट नीति तथा कार्यक्रम पारित हुन्छ ।