काठमाडौं, १ कात्तिक — एकजना बेलायती पुरुष श्रीमतीले असाध्यै किचकिच गरेको भन्दै घरबाट भागेर जंगलमा १० वर्ष बिताएका छन् ।

बर्मिङघमका माल्कम एप्पलगेटले इम्माउस ग्रीनविच वेबसाइटमा एउटा ब्लग लेखेर आफ्नो विगत र वर्तमानका बारेमा खुलस्त जानकारी दिए । इम्माउस ‘घरविहीन व्यक्तिलाई परोपकार’ गर्न र ‘आवश्यकता भएको मानिसलाई घर दिन तथा अर्थपूर्ण काम गर्न खोलिएको उसको वेबसाइटमा उल्लेख छ ।

एप्पलगेटले आफू २५ वर्षसम्म बगैंचे रहेको र आफ्नो कामलाई आनन्द लिने गरेको उल्लेख गरे । त्यसपछि उनले बिहे गरे । जति बढी उनी काम गर्थे, त्यति उनकी श्रीमती रिसाउँथिन् ।

श्रीमतीलाई सम्झाइबुझाइ गर्न खोजेपनि नसकेपछि उनी केही नभनी घरबाट निस्किए अनि दश वर्ष हराए ।

ती बगैंचेले आफू किङस्टननजिकको जंगलमा पाँच वर्षसम्म बसेको र पछि चाहिँ वृद्धवृद्धालाई स्याहार गर्ने केन्द्रमा बगैंचा सम्हालेको बताए । एकजना साथीले भनेपछि एप्पलगेटले इम्माउस ग्रीनविचमा बस्नका लागि निवेदन दिने निर्णय गरे ।

एप्पलगेटले आफू नयाँ घरमा खुशी रहेको र हालै आफ्नै बहिनीसँग सम्पर्क गरेको बताए । बहिनीले दाजु मरिसकेको भन्ठानेकी थिइन् ।

नाम नखुलाइएकी पत्नीले श्रीमानको नयाँ जीवनमाथि अहिलेसम्म टिप्पणी नगरेको बताइएको छ ।

‘उनी म लामो समय घरबाहिर बसेको मन पराउँदिनथिइन् । उनको नियन्त्रणात्मक व्यवहार हदभन्दा अघि बढिसकेको थियो र उनले मलाई कामको अवधि घटाउन भनेकी थिइन्,’ एप्पलगेटले लेखे ।

एजेन्सी