काठमाडौं, ३ कात्तिक–मंसिर १० गते पहिलो चरणमा हुने प्रतिनिधि सभा र प्रदेश सभाका लागि नेकपा एमाले र माओवादी केन्द्रले निर्वाचन क्षेत्रको भागवण्डा मिलाएका छन् । पहिलो चरणमा निर्वाचन हुने ३२ जिल्लाका प्रतिनिधि सभा तर्फका ३७ सिटमा माओवादीलाई १६ स्थान छाड्न एमाले राजी भएको छ ।
कार्यदलमा लामो गृहकार्यपछि दुईदलबीच भागवण्डा मिलेको एमालेका एक नेताले जानकारी दिए । जसअनुसार ताप्लेजुङ, पाँचथर, शंखुवासभा, ओखलढुंङगा, खोटाङ, दोलखा, रसुवा, सिन्धुपाल्चोक–२, नुवाकोट–२, धादिङ–१ धादिङ–२, मनाङ, मुस्ताङ, म्याग्दी, बाग्लुङ–१, डोल्पा, मुगु, बझाङ, बाजुरा, बैतडी, दार्चुला एमालेको भागमा परेको छ ।
भोजपुर, सोलुखुम्बु, रामेछाप, सिन्धुपाल्चोक–१, नुवाकोट–१, लम्जुङ, गोरखाका दुवै क्षेत्र, बाग्लुङ–२, रोल्पा, रुकुम पूर्व पश्चिम, जुम्ला, कालिकोट, हुम्ला, जाजरकोट जिल्ला माओवादीले पाएको छ । प्रदेश सभाका ७४ सीटमध्ये एमालेलाई ४१ र माओवादीलाई ३३ सीट लिने गरि दुई दलबीच सहमति जुटेको छ ।
निर्वाचन क्षेत्रमा सहमति भएपछि ती दलले शुक्रवार नै उम्मेदवार छनौट गर्ने तयारी गरेका छन् । पहिलो चरणमा हुने निर्वाचनका लागि कात्तिक ५ गते आइतवार उम्मेदवारी मनोनयन हुँदैछ ।
लोकतान्त्रिक गठबन्धनले भने उम्मेदवार टुंगो लगाउन सकेको छैन ।
