३० जेठ २०८३, शनिबार
मन्त्रालयका विकास आयोजना आफ्नो जिल्लामा मात्रै खन्याएको भन्दै स्वतन्त्र सांसद अमरेश कुमार सिंह शहरी विकास मन्त्री धनबहादुर बुढाप्रति आक्रोश व्यक्त गरेका छन् । उनले शहरी विकास मन्त्रालयको नाम परिवर्तन गरेर ‘मन्त्री विकास मन्त्रालय’ राख्न सुझाव दिए ।
विनियोजन विधेयकअन्तर्गत शहरी विकास मन्त्रालयमा विनियोजित शीर्षकमाथि बुधवार प्रतिनिधि सभा बैठकमा खर्च कटौती प्रस्ताव राख्दै सांसद सिंहले प्रधानमन्त्रीले गरेको प्रतिबद्धताविपरीत मन्त्रीले सबै योजना आफ्नै जिल्लामा लगेको आरोप लगाएका हुन् ।
‘शहरी विकास मन्त्रालयको नाम मन्त्री विकास मन्त्रालय लेखे हुन्थ्यो, मन्त्रीले डोल्पामा ३ पाना योजना लैजानु भएको छ । गुगल गरेर हेरे यस्ता मन्त्री दूनियामा देखेको थिइनँ’ मन्त्री बुढाप्रति लक्षित गर्दै सिंहले भने ।
प्रधानमन्त्रीले संघीय आयोजना ३ करोडभन्दा कम नगर्ने बताए पनि डोल्पामा स्मार्ट सिटीको नाममा एक लाखका योजना छुट्टाइएको उनले आरोप लगाए । मन्त्री बुढा नेकपा एसका नेता पनि हुन् ।
मन्त्रीले बजेटमा मनोमानी गरेको भन्दै सांसद सिंहले १८ जना मन्त्रीले दामासाहीमा आफ्ना क्षेत्रमा १ एक खर्ब बजेट लैजान चुनौती दिए ।
