१० साउन २०८३, आइतबार
नेपाली राष्ट्रिय क्रिकेट टोलीका अलराउन्डर दीपेन्द्रसिंह ऐरीले अन्तर्राष्ट्रिय क्रिकेट परिषद् (आईसीसी)को वरीयतामा छलाङ मारेका छन् ।
आईसीसीले बुधवार जारी गरेको टी–२० आईको अलराउन्डरतर्फको वरीयतामा तीन स्थान सुधार गर्दै दीपेन्द्र छैटौं स्थानमा उक्लिएका हुन् । यो उनले अहिलेसम्म हासिल गरेको उच्च वरीयता हो ।
यस क्रममा दीपेन्द्रले भारतका हार्दिक पान्ड्यालगायतलाई पछि पारेका छन् । उनी अस्ट्रेलियाका मार्कुस स्टोइनिस, श्रीलंकाका वानिन्दु हसरंगा, बंगलादेशका सकिब अल हसन, अफगानिस्तानका मोहम्मद नाबी र जिम्बावेका सिकन्दर रजाभन्दा मात्र पछाडि छन् ।
टी–२० आईको अलराउन्डरको शीर्ष स्थानमा अस्ट्रेलियाका स्टोइनिस उक्लिएका छन् ।
दीपेन्द्र बलिङतर्फ २७ स्थान सुधार गर्दै ९६ औंं स्थानमा छन् । यस्तै ब्याटिङतर्फ उनी पाँच स्थान सुधार गर्दै ४६ औं स्थानमा उक्लिएका छन् ।
टी–२० विश्वकपमा तीन खेल खेलेका दीपेन्द्रले ३२ रन बनाउनका साथै ६ विकेट लिएका थिए ।
