०७ असार २०८३, आइतबार
स्रोत नखुलेको १४ लाख ८० हजार नेपाली रुपैयाँसहित १ जना भारतीय नागरिक पक्राउ परेका छन् ।
पक्राउ पर्नेमा भारतको पूर्वी चम्पारण जिल्ला मोतिहारी झरोखर–७ जमुनिया बस्ने ३१ वर्षीय युवक रहेका छन् ।
उनलाई रौतहटको बौधिमाई नगरपालिका–७ बंकुलस्थित सीमा इलाकाबाट बिहीबार पक्राउ गरिएको सशस्त्र प्रहरीका सहप्रवक्ता डीएसपी शैलेन्द्र थापाले जानकारी दिए ।
बीआर ०५ बीबी ६२१२ नम्बरको मोटरसाइकलमा भारतबाट नेपालतर्फ आउँदै गरेका उनलाई सशस्त्र प्रहरी बल नेपाल बोर्डर आउट पोष्ट सरमुजवाबाट खटिएको टोलीले नियन्त्रणमा लिएको हो ।
विशेष सूचनाको आधारमा खटिएको प्रहरी टोलीले उनी सवार मोटरसाइकलको सिटमुनी उक्त रकम बरामद गरेको थियो ।
बरामद रुपैयाँ र मोटरसाइकलसहित आवश्यक कारबाहीका लागि उनलाई गौर भन्सार कार्यालय रौतहटमा बुझाइएको छ ।
थप अनुसन्धान भइरहेको प्रहरीले जनाएको छ ।
