भाटभटेनी सुपरमार्केटले युवाहरुलाई पार्ट टाइम काम दिने भएको छ । आगामी आर्थिक वर्षको सुरुवातदेखि नै २ हजार जना युवालाई काममा लगाउने गरी सुपरमार्केटले कर्मचारी भर्नाको प्रक्रिया सुरु गरिसकेको जनाएको  छ । 

भाटभटेनीका चिफ अपरेटिङ अफिसर (सीओओ)पानु पौडेलले कर्मचारी भर्ना प्रक्रिया सुरु गरिएको जानकारी दिए । उनले पहिलो लटमा २ हजार कर्मचारी भर्ना गर्ने सुपरमार्केटको योजना रहेको सुनाए । आगामी दिनमा यो संख्या बढाउँदै लगिने उनको भनाइ छ । 

 ‘आजबाट अनाउन्समेन्ट भयो । भोलिबाट विस्तारै कर्मचारी भर्नाका लागि बायोडाटा लिएर आवश्यक प्रक्रिया सुरु हुन्छ’, उनले बुधबार भने । 
उनले पार्ट टाइम कर्मचारीलाई के कति पारिश्रमिक उपलब्ध गराउने भन्नेबारे भाटभटेनीले आधिकारिक टुंगो लगाउन बाँकी रहेको जानकारी दिँदै अहिले कर्मचारीले पाइरहेको भन्दा केही धेरै नै हुने बताए । 

विशेषगरी विद्यार्थी वर्गलाई विभिन्न आर्थिक समस्या हुने र उनीहरुलाई कामसँगै रोजगारीमा पनि आबद्ध गराउने योजनाअनुसार यसरी पार्ट टाइमको अवधारणा ल्याइएको भन्दै पौडेलले दुई पक्षबीचको समझदारीको आधारमा कति घण्टा काम दिने भन्नेबारे निश्चित गरेर काममा लगाइने जानकारी दिए।