‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
सरकारले घरजग्गा खरिद बिक्री गर्नका लागि राष्ट्रिय परिचयपत्र अनिवार्य गरेको छ । गृह मन्त्रालयले राजपत्रमा सूचना प्रकाशित गर्दै आगामी माघ १ गतेदेखि घरजग्गा किनबेचमा पनि राष्ट्रिय परिचयपत्र अनिवार्य गरेको हो ।

अहिले क्रेता र बिक्रेताको नागरिकताबाट घरजग्गाको राजीनामा पास र लिखत पारित हुँदै आएको भए पनि माघ १ गतेदेखि राष्ट्रिय परिचयपत्रलाई सबै निकायतिर कार्यान्वयनमा ल्याउने उद्देश्य बमोजिम घरजग्गा किनबेचमा पनि राष्ट्रिय परिचयपत्र अनिवार्य गरिएको गृह मन्त्रालयका सहसचिव एवं प्रवक्ता नारायणप्रसाद भट्टराईले जानकारी दिए ।
००००
संक्रमणकालीन न्याय (टीआरसी)सम्बन्धी विधेयक चाँडै टुंगोमा पुर्याउन प्रमुख तीन दलबीच सहमति भएको छ ।
प्रधानमन्त्री निवास बालुवाटारमा बिहीवार साँझ बसेको बैठकमा नेपाली कांग्रेस, नेकपा एमाले र नेकपा माओवादी केन्द्रका शीर्ष नेताहरू सहमत भएका हुन् ।
००००
नेकपा एकीकृत समाजवादीले २१ सदस्यीय पदाधिकारी र २९९ सदस्यीय केन्द्रीय कमिटी बनाउने निर्णय गरेको छ । 

बिहीवार आलोकनगरमा बसेको पार्टीको सचिवालय बैठकले २१ पदाधिकारी र २९९ केन्द्रीय सदस्य बनाउने निर्णय गरेको जानकारी प्रवक्ता जगन्नाथ खतिवडाले दिए ।
००००
स्थापनाको २ वर्षमै राष्ट्रिय स्वतन्त्र पार्टी (रास्वपा)भित्र अस्वाभाविक छटपटी र उकुसमुकुस विस्फोट हुन थालेको छ । २०७९ असार ७ गते स्थापना भएलगत्तै ५ महिनापछिको चुनावमा २० सिट जितेर रास्वपाले परम्परागत दलविरुद्ध धावा बोलेको थियो । 

टेलिभिजन प्रस्तोताको रूपमा जबर्जस्त छवि बनाएका रवि लामिछानेले आफ्नै ‘ब्रान्ड’मा रास्वपालाई स्थापित गराए । छोटो समयमा पार्टीलाई संसदमा २१ सिट दिलाएर चौथो शक्तिमा पनि र्पुयाए । उनकै नाम र ब्रान्डले रास्वपाले छोटो समयमा परम्परागत शक्ति कांग्रेस, एमाले र माओवादीलाई हायलकायल नै बनाइदियो । पुराना दललाई ‘सक्किने कि सच्चिने’ भन्नेसम्मको स्थितिमा र्पुयाउने गरी रास्वपाले चितवन– २ र तनहुँ– १ को उपनिर्वाचनमा पनि शानदार जीत दर्ता र्गयो ।

रातारात उदय र उचाइ रास्वपाको पहिचान थियो । उदयकै रफ्तारमा विवाद, संकट र समस्याको चाङमा रास्वपा भासिँदै आएको छ । पार्टीभित्र देखिएका बेथिति र असन्तुष्टि यसअघि नेताको तहमै सीमित हुन्थ्यो । यसअघि नेताको तहमै सीमित भएका असन्तुष्टि विस्तारै छताछुल्ल हुन थालेका छन् । 

पार्टी स्थापनाको केही समयसम्म सभापति लामिछानेका विश्वासपात्र मानिने महामन्त्री एवं पार्टी प्रवक्ता डा मुकुल ढकालले देशभर डुलेर सभापतिलाई बुझाएको प्रतिवेदनले असन्तुष्टि विस्फोटको संकेत गरेको हो ।
००००
पुँजीबजारमा पछिल्लो तीन दिनको कारोबारमा नेपाल स्टक एक्सचेञ्ज (नेप्से) परिसूचक लगातार घटेको छ । गत मङ्गलबार र बुधबार लगातार ओरालो देखिएको नेप्से परिसूचकले बिहीबार पनि निरन्तरता पाएको हो । 

यो साताको कारोबारको अन्तिम दिन बिहीबार नेप्से परिसूचक आठ दशमलव २४ अङ्कले घटेर दुई हजार ५१ दशमलव ९२ को विन्दुमा कायम भएको हो ।
००००
सेन्चुरी कमर्सियल बैंकले नक्कली कर चुक्ता प्रमाण पत्रकै आधारमा २ अर्ब ३० करोड रुपैयाँ बढी कर्जा प्रवाह गरेको पाइएको छ । बैंकका कर्मचारी र पदाधिकारीको मिलेमतोमा थाहा हुँदाहुँदै पनि कर्जा प्रवाह गरेको प्रहरी अनुसन्धानबाट खुलेको छ । 

नेपाल प्रहरीको केन्द्रीय अनुसन्धान ब्यूरोले दुईपटक गरेर पक्राउ परेका १९ जनालाई तारेखमा छाडेर विस्तृत अनुसन्धान थालेको छ ।
००००
जल तथा मौसम विज्ञान विभाग, मौसम पूर्वानुमान महाशाखाले शुक्रबारदेखि मनसुन थप सक्रिय हुने जनाएको छ । 

महाशाखाले वर्षा बढ्ने भएकाले पूर्वतयारी र आवश्यक सतर्कता अपनाउन भनेको छ । केही दिन मनसुनको न्यूनचापीय रेखा पूर्णरूपमा विकसित भई सरदर स्थानभन्दा उत्तरतर्फ (नेपाल नजिक) अवस्थित रहने देखिएकाले आगामी केही दिन नेपालमा मनसुन थप सक्रिय हुने महाशाखाले जनाएको हो ।
००००
गण्डकी प्रदेशका सांसद फणीन्द्र देवकोटालाई प्रदेशसभा बैठकमा प्रवेश गर्न रोक लगाइएको छ । सर्वोच्च अदालतले सांसद पद थमौती गरेपछि बिहीबार प्रदेश सभा बैठकमा सहभागी हुन पुगेका उनलाई मर्यादा पालकले रोकेका हुन् ।
००००
राष्ट्रिय परीक्षा बोर्ड, परीक्षा नियन्त्रण कार्यालयले माध्यामिक शिक्षा परीक्षा (एसईई) को नतिजा सार्वजनिक गरेको छ । 

कार्यालयले बिहीबार बिहान नतिजा सार्वजनिक गरेको हो । ‘लेटर ग्रेडिङ’ निर्देशिका, २०७८ अनुसार नतिजा सार्वजनिक गरिएको हो । 

परीक्षा नियन्त्रक नन्दलाल पौडेलका अनुसार परीक्षामा सहभागी भएका चार लाख ६४ हजार सात सय ८५ जनामध्ये ४७.८६ प्रतिशत विद्यार्थी उत्तीर्ण भएका छन् ।