स्लोभाकियामा रेल र बस ठोक्किएः सात जनाको मृत्यु

ब्राटिस्लाभा–दक्षिणी स्लोभाकियामा बिहीबार रेलवे क्रसिङमा यात्रुवाहक रेल र बस ठोक्किँदा सात जनाको मृत्यु भएकाे छ । साथै अन्य पाँचजना घाइते भएको उद्धारकर्मीहरूले बताएका छन् । 

दुर्घटना स्थानीय समयअनुसार साँझ ५ बजेपछि दक्षिण–पश्चिमी शहर नोभे जम्कीनजिकै भएको सिटिके समाचार एजेन्सीले बताएको छ ।

रेलवेका प्रवक्ता भ्लादिमिरा बाहिलोभाका अनुसार युरोसिटी रेल प्रागबाट बुडापेस्टतर्फ गइरहेको थियो । स्लोभाक उद्धार सेवाले भनेको छ, ‘सात जनाको मृत्यु भएको छ, पाँचजना घाइते भएका छन् ।’

उद्धार सेवाका प्रवक्ता पेट्रा क्लिमेसोभाले घाइतेहरूलाई ‘तत्काल चिकित्सकीय सहायता’ आवश्यक रहेको बताए । 

बाहिलोभाले रेलका चालक लोकोमोटिभमा आगो लागेका कारण जलेको जनाए । उनले बाधाहरूले सुरक्षित र प्रकाश सङ्केतले सुसज्जित भएको रेलवे क्रसिङमा दुर्घटना भएको जानकारी दिए । 

गृहमन्त्री माटुस सुताज एस्टोक पछि दुर्घटनास्थलमा पुगे । उनले दुर्घटनाको कारण प्राविधिक वा मानवीय विफलता थियो भन्नेबारे स्पष्ट नभएको पत्रकारहरूलाई बताए । 

स्थानीय सञ्चारमाध्यमहरूले आकाशमा बाक्लो धुँवा उडिरहेको र आंशिकरूपमा आगो लागेको रेलका साथमा सामान बोकेका यात्रुहरूको भिडियो फुटेज प्रसारण गरेका छन् ।